Зохиолч: Б. НАЦАГ
Орчуулагч:
Ангилал: Монголын уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Хонгорын өргөн тал цагаан цасаар хучигдаж, сахлаг өвсний өнгөтэй нийлээд шаргал цагаан харагдана. Их талын дунд цацсан тариа шиг эрээнтэж цоохортон жирийж байгаа үй түмэн адуу нь дэлхийн чимэг мал гэдэг монгол хүний хуучин үгийг санагдуулнам. «Нийлсэн олон мал байвал нэгдлийнх» гэгчээр энэ бол Оргил нэгдлийн отрын адуу аж. Адууны гаргасан зөрөг замууд хөндлөн гудасгүй зурайгаад, түүний сүлжээний уулзварт оторчдын суудаг жижигхэн цагаан гэр, адууны зогсоолын тодхон хар бууцны дундаас, мөөг мэт бумбайн харагдана. Цагаан сар гарах дөхөөд заримдаа аятай дулаан юм шиг байвч тасхийм жавар малчин хүний хацрыг хайрах нь хүйтний эрч буураагүйн шинж аж. Энэ өдөр овоо дулаан байснаа орой болж, толгодын сүүдэр бууж эхлэхэд дахин жавар орлоо. Нэгдлийн адуучин залуу Чулуун, Тээгийн бэл өөд огшоод байсан адууныхаа урд захыг эргүүлж тал руу нь аажимхан туулаа...
