Би энэ харамсалтай домгийг Тамир сумын «Гэрэлт зам» нэгдлийн зуслангийн айлуудаар явж байхдаа сонссон юм.
Арван тавны тэргэл сар агаар дундаа мэлтийгээд шөнийн цайвар од мичид цөөрсөн мэт сүүмэлзэн үзэгдэж байгаа үдшийн цаг байлаа. Тамирын голын захыг дагаж байрласан нэгдлийн тэр хэсэг айлын зуслангийн газар эгнүүлэн барьсан хөнгөн маягийн олон жижиг байшин нь энэ үдэш хөл хөгжөөн багатай байлаа. Тэдний ихэнх хүмүүс нь нэгдлийн төвд байгаа хоёр залуугийн хуримд очиж зөвхөн гэр сахисан өндөр настан, хүүхэд багачууд үлджээ. Би явсаар дунд хэрд нэг байшингийн цонхоор гэрэл үзэгдэж байхаар нь тэнд хүрч очлоо...
