Чадрааг тойргоор гулгах замд хөх ноосон хувцастай нарийхан цагаан хүүхэн хэд хэд дайралджээ! Чадраа сүүл сүүлдээ тэр бүсгүйтэй албаар тулгарахыг эрмэлзэх болов. Тэр бүсгүйн хоёр нүд цогтой тормолзон нэхмэл ноосон малгайд нь сэвсгэр цан суусан харагдана. Талбайн нэг талаас нөгөө талд яваа тэр бүсгүйг харахад огторгуйд нисэж яваа шувууны дүрс сэтгэлд бууна. Бүсгүйг нэг удаагийнхаа тойролтоор чанх өмнөө ирэхэд Чадраа савх шиг шулуухан хоёр хөлийг нь харж «ямар сайхан цэх хөл вэ» гэж гайхжээ. Орой болж мөсөн гулгуурын талбай хаахад тэр бүсгүй хөл бөмбөгний хаалгач залуугийн сэтгэлд хэзээ ч бүдгэрэмгүй шинэ бодол төрүүлчхээд харилаа...
