Зохиолч: Тибор Дери
Орчуулагч: Харгана Г. Амар
Ангилал: Гадаадын уран зохиол
Хэвлэлийн газар: Улсын хэвлэлийн газар
Гяндангийн хаалга гэнэт нээгдэж хуяг нэгэн боодолтой юм чулуудаад
— Май, ав! гэж дуртай дургүй хэлэв.
Тоо тавьсан ууттай юм хоригдлын хөлийн дэргэд тусав. Хоригдол Б. ханзнаасаа бууж гүнээ санаа алдаад хуяг өөд гайхан ширтжээ.
— Таны хувцас! Наадхаа өмсөөрэй! Одоо сахлыг чинь хусна гэж хуяг хэлэв.
Уутан дотор долоон жилийн өмнө тайлсан костюм нь байв. Костюм учиргүй үнгэгдэж үрчийгээд тэртээ нэгэн цагт индүүдэж байсан юм гэж санахын аргагүй болж, хоёр гутал нь хөгц хужирт битүү идэгджээ. Цамцаа дэлгэж үзвэл бас л хөгцөрч наалдсан байв. Хоригдол Б-г хувцаслаж амжаагүй байтал битүү ургасан сахал самбайг нь хусахаар сахал хусдаг хоригдол орж ирэв.
Түүнээс хойш нэгэн цаг өнгөрөөд хоригдол Б-г шоронгийн захиргаанд авчрахад гудамд хаалганы хажууд энгийн хувцас өмссөн арваад хоригдол ээлжээ хүлээн бөөн зогссон байлаа. Гэтэл...
