Зохиолч: Мартин Андерсен Нексе
Орчуулагч: X. Гунгаажав
Ангилал: Гадаадын уран зохиол
Хэвлэлийн газар: Улсын хэвлэлийн газар
Ширүүн салхи тэр хүүхний өтгөн үсийг хар туг мэт бутарган хийсгэнэ. Мортен гарынхаа уяаг авч хоёр гараараа Жаннетын үсийг засахад тус болж өгөв.
— Чиний өвчтэй гар чинь яасан сайн мэдээтэй болоо вэ? Наад гараа миний толгой дээр дахиад тавиач. Их сайхан байна.
Мортен түүний толгойг цээжиндээ наалдуулан чанга тэвэрнэ. Жаннета халуурсан мэт чичирч эхэлсэн боловч аажмаар тайвширч ертөнцийн нэг сайхныг үзсэндээ нүдээ анив. Мортен хацар дээр нь үнсэх гэсэн боловч уруул дээр нь үнсэж орхилоо.
Тэр хоёр жижиг толгойноос хөндийд буун Лихтенталь гэдэг тосгон хүрч тэндээсээ паркаар дамжиж Баден-Баденд буцаж ирцгээв.
Галт тэрэгний буудал дээр Мортен галт тэрэг хөдлөхийн өмнө:
— Бид хоёр үүнээс хойш дахиж уулзахгүй гэж үү? гэж Жаннетаас асуув.
— Чамайг л уулзъя гэж бодвол би хаанаас татгалзах вэ гэж Жаннета Мортены гарыг чанга атган өгүүлэв.
