Эрдэмтэн Жамсраны Цэвээний Ордос нутгаас хорьдугаар зууны эхний үед олж авсан бөгөөд Ленинградад хадгалагдаж байгаа эх бичгээс хуулж аваад үсгийн илэрхий алдааг бага сага засаад хэвлэвэй. Энэ болбоос Монголын ард олны уламжлалт ёслол хуримд хэлэх ерөөл зэргийг эмхэтгэсэн сонин ном бөгөөд арван дөрөв, арван тавдугаар зууны үеийн ном мэт боловч бас хойно нэмж оруулсан үг үсэг цөөнгүй байх бололтой. Хонжин гэдэг нь ёслолын хэргийг эрхэлсэн сайд түшмэлийн хэргэм байсан мэт. Хубилай сэцэн хааны үед шашин төрийг хослох журмыг тогтоосон “Арван буянт номын цагаан түүх”˗ийн дотор хонжин гэдэг үгийг олон удаа дурдсан байдаг. Өвөр монголын Ордос нутагт байгаа Чингисийн онгоны тахилгын хэргийг эрхэлсэн түшмэлийг одоо хүртэл Хонжин хэмээмүй. “Хонжин дэвтэр” хэмээсэн нь ёслолын хэргийг эрхэлсэн түшмэлийн дэвтэр хэмээсэн утгатай үг буй за.
Ц. Дамдинсүрэн
