Үүнийг “Жавзандамба хутагт шүлэглэн дуулбай” хэмээснээс өөр, Жавзандамба хутагтын аль дүр зохиосныг тэмдэглэсэнгүй. Үүнийг Өндөр гэгээн зохиосон гэж ерийн хүмүүс ярьдаг боловч Өндөр гэгээний намтар ба зохиосон номын цэсэд “Сав шимийн дуулал”˗ыг зохиов хэмээсэн үг байхгүй баймуй. Харин тавдугаар богд “Сав шимийн намтар” хэмээх зохиолыг 1840 онд зохиосон баймуй. Энэ нь “Болор толь”˗ийг товчилсон дэвтэр мэт боловч “Болор толь”˗д байхгүй зарим мэдээг нэмсэн баймуй. Тавдугаар богд, ертөнцийн байдлыг үзүүлсэн “Сав шимийн намтар”˗ыг зохиогоод ертөнцийн мөн чанарыг шажны ёсоор үзүүлсэн “Сав шимийн дуулал”˗ыг зохиосон байж болох юм. “Сав шимийн дуулал”˗ыг чадамгай шүлэгч хүн бичсэн нь илэрхий. Тавдугаар богд төвдөөр шүлэг бичдэг боловч монголоор тийм чадамгай шүлэгч байсан эссэн нь мэдэгдэхгүй бөгөөд төвд хэлэн дээр байгаа түүний зохиолын цоморлогт энэ зохиол байхгүй юм. Бас зарим хүний хэлэх нь, “Сав шимийн дуулал”˗ыг Цахар гэвш монголчлон орчуулж хэвлэсэн гэж баймуй.

Гэвч “Сав шимийн дуулал”˗ын хэвлэгдсэнийг бид ер олж үзсэнгүй. “Сав шимийн дуулал” нийтэд бичмэлээр их түгсэн зохиол юм. Гэвч нэг бүтэн бүрэн зөв бичигтэй хуулгыг бид олж үзсэнгүй. Арваад хуулгыг нийлүүлэн хянаж энэ эхийг хэвлэж байгаа боловч уг зохиолын алдаа мадгийг гүйцэд арилгаж бас чадсангүй.

Ц. Дамдинсүрэн