Үүнийг Монгол улсын номын санд байгаа “Олон зүйлийн сургаал шүлэг домог ба ерөөл зэргийн ном дэвтэр” нэртэй бичмэл цоморлогоос хуулж авав. Уран шүлэг сургаалын дээж болсон энэ цоморлогийг Монгол улсын номын санд олон жил ажиллаж байсан Лувсан гэвш эмхэтгэж, өөрийн гараар хуулж бичсэн юм. Лувсан гэвшийн эмхэтгэсэн цоморлогийн агуулга, монгол уран зохиолын судлагч нарт сонирхолтой байж болох тул түүний агуулгыг сийрүүлье.
- Шиваа бугын үлгэр
- Туулай, төлөг, чоно гурвын үлгэр
- Нум сумны магтаал
- Богдыг монголын хаан суухад тавьсан ерөөл
- Ерөөлч Гэлэгбалсангийн холбон зохиосон домын ерөөл
- Тэнгэрийн бороо хур гуйж тавьсан Гэлэгбалсангийн ерөөл
- Тогоо нэрүүлж архи уусан этгээдийн бэлэглэх мэт үгс
- Үгэнд дуртай хоёр хүний үгс
- Лүй гүн багшид цэцэн бага шавийн хариулсан үгс
- Орчлонгийн сав шимийн дуулал
- Чингис богдын зохиосон Алтан товч хэмээх шастир
- Сэтгэлийг амраагч билгийн толь
- Архины гэмийг тоочсон шүлэглэл
- Тодорхой толь хэмээх сургаал
- Нэгэн үсгийн эрдэм хэмээх дөрөв таваар холбосон сургаал
- Шинса гэгээний зохиосон худал хорин үг хэмээх найруулга
- Олон хөгшид хүүхдийн хэлэлцдэг үгсийн товч хэмээх сургаал
- Сургаалын үгс тод сарны гэрэл
- Бяцхан хөвгүүдийг удирдан заах зүйл
- Орчлон мөнх бус, өтлөх жамыг уйтгарласан шүлэг сургаал
- Арван хар, таван завсаргүй нүгэл хийгээд буяны ялгалыг холбосон сургаал
- Хэрээний хэл шинжлэх зүйлүүд
- Гандан тивийн Гүрүгээс бичсэн сургаал
- Их шидэт Мидари Зоги цөвийн цагийн байдлыг номлосон анги
- Хав, муур, хулгана хийгээд саваагүй хоёр өвгөн тавын хэлэлцсэн домог
- Тоть шувууны сургаал
- Манжийн хаадын үе дараа
- Ноён гэгээний зохиосон хавар цагийн зугаа хэмээх сургаал
эдгээр болой.
Энэ цоморлогийн дотор орсон сургаал шүлгүүд цөм монгол нийтэд түгээмэл дэлгэрсэн зохиолууд билээ. Жишээ нь: Энэ хорин найман зохиолын гурваас бусад нь хөдөө нутагт хүүхэд байхдаа миний уншиж танилцсан зохиолууд баймуй. Тэр гурав нь, Шива бугын үлгэр, Богдыг хаан суухад тавьсан ерөөл, Гэлэгбалсангийн ерөөл эдгээр болмуй.
Ц. Дамдинсүрэн
