Зохиогч энэхүү романдаа түүхэн баримт хэрэглэгдэхүүнийг ашиглан, нэгтгэн дүгнэж, бослогод оролцсон жинхэнэ ард ангийн гарал бүхий хүмүүсийн тод томруун дүрийг бүтээж, тэрчлэн бослогын удирдагч Амарсанаа, Чингүнжав нарын эх оронч үзлийг үнэмшилтэйгээр харуулсан байна. Амарсанаа, Чингүнжав болон ардын бусад баатрын дүрүүдээс гадна, монголын шашны тэргүүн, 1755-1758 оны бослогыг талархаж, түүнд оролцсон учир манж нарт цаазлагдсан Ван Рэнцэндоржийн ах, хоёрдугаар Жавзандамба хутагтын нарийн ээдрээтэй зөрчилтэй үнэн, бидний үзэж байгаагаар эмгэнэлт ч гэж хэлж болохоор дүрийг зохиож бүтээж чадсан байна.
Жавзандамба хутагт эрх чөлөөний тэмцлийг зөвхөн талархагч байгаад зогсохгүй, түүгээр үл барам энэ хөдөлгөөнийг сэдэн үүсгэгчидтэй нэг бөгөөд Оростой холбоо байгуулж, хамтран ажиллахыг эрмэлзэж байсныг архивын бусад баримт сэлт гэрчилж байна. Манж нар Жавзандамбын нэр, нөлөөг түүний хүсэл зоригоос гадуур, бослогыг дарах зэвсэг болгон ашиглаж байсан юм. Тэр бээр хожим нь бусад ноёдын хамт хороогдсон билээ.
Монголчуудын түүхийн чухал үеийг үнэн мөнөөр нээн харуулж, уран сайхны өндөр түвшинд туурвигдсан «Болор толь» хэмээх роман нь харийн булаан эзлэгчдийн эсрэг гартаа зэвсэг барин тэмцэж байсан өвөг дээдсийнхээ гавьяат үйлсийг хойч үеийнхэн нь гүнээ хүндэтгэж байдгийн тод илрэл болсон гэж бид үзэж байна.
Түүхийн ухааны доктор Ш. Б. Чимиддоржиев,
