Замбуутивийн умард зүгт байна гэдэг ариун орон Шамбалын тухай нэлээд тайлбарлаж ярих хэрэгтэй юм. Дээр дурдсан Очирт суурин, Утай, Бодалан, Одаяна нь үнэхээр бодтой байсан буюу бодтой байгаа орон газар юм. Гэтэл энэ Шамбал (санскритаар Шамбхала, төвөдөөр Sham bha la; bDe ‘byung) бол урьд нэг цагт бодтой байсан мэт боловч одоо байхгүй үлгэр домгийн орон юм. Шамбалын орны тухай бичиг судар ба аман домог яриа Төвөд, Монгол орноор дүүрэн байдаг. Монголын хувьсгалын “Улаан туг” гэдэг дуунд “Шавь нар болсон бид нар Шамбалын дайндаа мордъё” гэсэн хоёр мөр ч байсан билээ. Хуучин үеийн Монголын дуу шүлэг уран зохиолд Шамбалын тухай үг домог олон тохиолддог байна. Шамбалын тухай домог байдаг хамгийн чухал ном нь Ганжуурын тантрын аймгийн тэргүүн боть юм...
