— Өвөг аав чинь унаанаас бэртэж орноосоо өндийж чадахаа больсон. Амьсгаа хураахын өмнө хүүтэйгээ уулзах юм сан гэж ярьж байна билээ. Аав чинь маргааш өглөө морь хөтлөөд хүү рүүгээ явна гэж ярьж байсан шүү гэж нутаг ус нэгт Бат гуайн хүү хэллээ. Өвөг эцэг минь ёстой л миний төлөө амь голоо тавьдаг хүний нэг! Төрүүлсэн ээж минь хорвоогийн мөнх бусыг үзүүлсэн болохоор даахин сэвлэгтэйгээсээ би эмэг эх, өвөг эцэг хоёр дээр дэрвэж өссөн юм. Харин сургуулийн босго алхмагцаа л тэднээсээ арга буюу холдож билээ. «Миний хувь» гээд л амттан шимттэн тусгайд нь нандигнан боож ааваар явуулсан байдаг сан. Ийм л өвөө минь хэвтрээсээ өндийж чадахыг больж шүү дээ.
Би нэхий дээлээ хөөргөсхийн бүсэлж цагаан хурган малгайгаа бүчлэн гарахдаа «Өвөөгийн бие муу гэнэ» гэж...
