Зохиолч: Амин Рейхани
Орчуулагч: Э. Дондмаа
Ангилал: Гадаадын уран зохиол
Хэвлэлийн газар: Улсын хэвлэлийн газар
Би төрөлх хотдоо хүрч ирээд түүнийгээ таньсангүй. Сэтгэл санаа үймрэн хайртай хотоороо хэрэн хэсээд харийн хүн шиг санагдав. Би нөхөд ах дүү нарынхаа хэн нэгтэй тааралдах болов уу хэмээн горьдож хөл хөдөлгөөнт замын уулзварт зогслоо. Гэтэл хажуугаар олон хүн сүнс сүүдэр мэт сүлжилдэн өнгөрнө. Би ч тэднийг таньдаггүй, тэд ч намайг мэддэггүй. Би гарцаагүй л төрөлх хотдоо ирээд байлаа. Тэгтэл ард түмэн маань, үй зон маань хааччих аа вэ? Алс газар явахаар хагацан одохдоо салах ёс гүйцэтгэсэн чинээлэг хүмүүс маань ийм навсайсан болчихлоо гэж үү? Өчигдөрхөн л өндөр дуган тахиж, их сургууль сүндэрлүүлж, эрдэм номын туг өргөн мандуулж байсан алдар цуутай, ач буянтай, хүмүүс маань энэ гэж үү? Энэ хэрзийж зүдэрсэн зүлд сүүдрүүд арилжаа наймаа хийж, сурч гэгээрэн тэмцэж, аз жаргал төгс аж төрж байсан эрэлхэг чийрэг эрс маань гэж үү? Би тийнхүү бодлогошрон замын уулзвар дээр зогсоход зүрх шимширнэ...
