(1885 — 1944)
Румыны үргэлжилсэн үгийн нэрт зохиолч Ливиу Ребряну нь Трансильвины хойд хэсэгт, Клуж хотын ойролцоо байдаг Тырлишиуа тосгонд 1885 онд багшийн гэр бүлд төржээ.
Түүний төрсөн нутаг Трансильван нь 1918 он хүртэл Австри-Унгарын эзэмшилд байсан учир ирээдүйн зохиолч румын, герман, унгарын бага дунд сургуульд суралцаж байх үеэсээ эхлэн үндэсний асуудлыг өргөн цар хүрээтэй ойлгодог болсон нь хожим шилдэг бүтээлүүдээрээ үндэсний дээрэнгүй үзлийн эсрэг тэмцэхэд чухал нөлөө үзүүлсэн юм.
Л. Ребряну дунд сургуулна төгсөж мэргэжлээ сонгон авахдаа зөвхөн уран бүтээлээр тухайн нийгэмдээ амьдарч чадахгүйг мэдэрч Будапештийн цэргийн дунд сургуульд орж суралцсан боловч өөрийн сэтгэлийн дуудлага болсон уран зохиолоо орхисонгүй утга зохиолын факультетад хамт суралцжээ. Энэ үеэс эхлэн унгар, герман, оросын шилдэг зохиолчдын бүтээлийг амтархан уншиж, судалж, орчуулж эхэлсэн байна. Чингээд цэргийн сургуулиа төгсөж австри-унгарын армийн офицер болсон авч цэргийн албанд тохирохгүйгээ удалгүй ойлгож цэргээс халагдан Трансильванаас гарч, 1908 онд Бухарест хотноо хүрэлцэн ирэв. Румынд ирснийхээ эхний арав гаруй жилийг буюу түүний уран бүтээлийг эрийн цээнд хүрсний гэрч болсон «Ион» романыг хэвлэгдэх хүртэл сэтгүүлч, орчуулагч хийж явжээ.
Румынд ирснийхээ дараа бичиж нийтлүүлсэн өгүүллэгүүдээ эмхэтгэн «Зовнил» (1912), «Хөл нүцгэнүүд» (1916) гэдэг ном болгон хэвлүүлсэн байна. Чухам энэ үед л «Ион», «Бослого» романы анхны сэдэв зохиолчийн сэтгэлд урган гарч соёолж эхэлсэн ажгуу.
Дэлхийн нэгдүгээр дайны (1914—1918) үед германчууд Бухарест хотыг эзлэн авсан хугацаанд Л. Ребрянуг австри-унгарын цэргээс оргосон гэж тооцон эрж байсан учир зохиолч нийслэлээс дүрвэн гарч нууц байдалд байв. Энэ үеийн хүнд амьдралаа дайн дуусмагц хэвлэгдсэн «Зовлон туулсан нь» (1919) тууждаа тодорхой бичсэн байдаг. 1919 онд «Ичгүүр» гэдэг тууж бичиж түүнийгээ засварлан томруулж «Инж» гэдэг роман болгосноо дахин өөрчлөн засаж түүнд нэр алдар авчирсан «Ион» роман болгожээ. 1920 онд хэвлэгдсэн «Ион» роман нь уншигч, шүүмжлэгчдийн анхаарал, маргааны төвд байв.
«Ион» романы дараа дайны сэдэв бүхий «Гурван тууж», «Дүүжлэгдэгсдийн ой» (1922) романаа нийтлүүлснээс гадна түүний уран бүтээлийн оргил болсон «Бослого» романаа 1933 онд уншигч олондоо барьжээ.
Их зохиолч том бүтээл туурвихын зэрэгцээ түүхэн сэдэвт өгүүлэл, театрын тэмдэглэл бичиж, сэтгүүлийн эрхлэгчээр ажиллаж байв.
Илүү дэлрэнгүйг Wiki-гээс
