СКОТТ ВАЛЬТЕР
(1771 — 1832)
Английн нэрт зохиолч Вальтер Скотт Өрнө дахины түүхэн романы эцэг гэж алдаршжээ. Тэрээр романууддаа улирч өнгөрсөн түүхэн явдлыг үзүүлж В. Г. Белинскийн бичсэнээр «түүхийн нууц пүршийг» олж илрүүлдэг байв.
В. Скотт Шотландын Эдинбург хотноо хууль цаазын мэргэжилтний гэрт төржээ. Тэр Шотландын нэг тойрогт алба хааж, Эдинбургийн шүүхэд нарийн бичгийн дарга байх үедээ нийгмийн янз бүрийн давхрааны хүмүүстэй учирч тэдний аж байдлыг сайн мэдэх болжээ. Энэ үедээ бас ардын домог, аман зохиол сонирхон цуглуулснаа 1802—1803 онд «Шотландын дуу» хэмээх нэрээр гурван боть эмхэтгэл гаргаж нийтлүүлсэн байна. 1805 онд «Сүүлчийн магтаалчийн дуулал», дараахан нь «Мармион», «Нуурын охин» зэрэг романтик найраглал бичжээ.
1810-аад оны үед Шотландын сэдвээр бичсэн «Роб Рой», «Пуритан шашинтнууд», 1820-иод оны үед Английн сэдвээр бичсэн «Айвенго», мөн «Квентин Дорвард» зэрэг роман нь ихэд алдаршжээ.
«Айвенго» романдаа XII зууны үеийн түүхт үйл явдлыг зураглан гаргасан юм. «Пуритан шашинтнууд» романдаа Англид дахин тогтсон Стюартын удмынхны эсрэг 1679 онд Шотландад гарсан пуритан шашинтны бослогыг дүрслэн үзүүлэхдээ түүхийг бүтээгч нь ард түмэн юм гэдгийг уран сайхны аргаар нээн харуулсан юм.
Түүнийг Францын суут зохиолч О. Бальзак «багшаа» гэж үздэг байв. В. Г. Белинский В. Скоттын зохиолд «бодит байдал» дүрслэгдсэн байдаг тул түүний зохиол туурвил нь «түүхэн ба бие хүний амьдралын толь» болдог тухай бичсэн билээ.
В. Скоттын «Айвенго» хэмээх роман болон зарим өгүүллэг нь монгол хэлнээ орчуулагдаж, уншигчдын сонирхол татсаар байна.
Эх сурвалж: "Хүүхэд залуучуудын нэвтэрхий толь, 3" 1988 он
Дэлгэрэнгүйг Wiki-гээс
