Вильгельм Хауф
(1802 - 1827)
Вильгельм Хауф 1802 оны арван нэгдүгээр сарын 29-нд Штуттгарт хотноо түшмэлийн гэр бүлд төржээ. Эцгийгээ нас барсны дараа эх, ах, дүү нарынхаа хамт нагац эцгийн гэрт суух болжээ. Хөгшин аавын нь номын сан авьяаслаг сэргэлэн хүүгийн уран сэтгэмжийг ихэд бадрааж улмаар эмэгтэй дүү нар болон тэднийхээ найз охидод өөрөө үлгэр зохион ярих чадварыг олгосон байна. Ерийн болон шашны сургуульд суралцан эцэстээ гэрийн багшаар ажиллаж, энэ бүх хугацаандаа уран зохиол амтархан уншиж сонирхож оролдсоор анхныхаа бүтээлүүдийг хэвлүүлж эхэлсэн байна.
«Бяцхан авьяастай төрсөндөө би маш их баяртай байна... » гэж хорин гурав ч хүрээгүй Вильгельм Хауф зохиолчийн хөдөлмөр эрхэлсэн хамгийн таатай үедээ хамаарагдах 1825 оны есдүгээр сарын 3-нд нэгэн захидалдаа бичжээ. 1825 оны хавар Хауф Штуттгартад ах дүү Франктай хэвлэлийн гэрээ хийж «Шулмын дуртгалаас хийсэн мэдээлэл» гэдэг зохиолынхоо эхний хэсгийг хэвлүүлэхээр болсон байлаа. Уг ном нь тэр жилийнхээ зун хэвлэгдэж гараад уншигчдын таашаалыг хүлээснээр барахгүй шүүмжлэгчид зохиогчийнх нь авьяас билгийг үнэлэн сайшаажээ.
Энэ үеэс эхлэн Хауф тэр үедээ алдаршсан хэд хэдэн роман бичиж ардын аман зохиолыг найруулан боловсруулж өргөн олон уншигчдад зориулсан орчилт үлгэрүүд хэвлүүлж байлаа.
Түүний бичсэн олон тооны бүтээлээс ихэд алдаршин дэлхий дахины уншигчдын хүртээл болсон нь «Бремений уушны газар төрсөн уран сэтгэмж» гэдэг туурь, 16-р зууны германы түүхээс сэдэвлэн бичсэн «Лихтенштейн» гэдэг роман, романтик уран сэтгэмж, аж төрлийн үнэнийг хослуулан туурвисан үлгэрүүд нь юм.
