Карло Гольдони
(1707 - 1793)
Карло Гольдони бол Италийн жүжгийн их зохиолч мөн.
1738 оноос эхлэн Гольдони жүжгийн зохиолын ажилд анх эхэлж ороод жинхэнэ театрт 1748 онд Италийн Венеци хотод ажиллажээ. Тэр үед Гольдони 40 гаруй настай байж, авьяас чадвар нь ид оргилж байжээ. Үүнээс өмнө Гольдони хэрэг шүүгч түшмэлийн ажилтай байж тэр үеийн Италийн хамгийн тэргүүний соёлтой байсан Лигури, Ломбард, Тоскан гэх зэрэг нутгаар оршин сууж тэр үеийн Италийн нийгмийн амьдралыг нарийнаар ажиглан судалж, бүх зүйлтэй нь танилцжээ.
Гольдони тэр үеийн нийгмийн хөгжил буурлын гол онгон судсыг нарийн ажиглаад зохиолдоо гарамгай хэрэглэж чадсанаар тайзны зүйрлэшгүй мастеруудын нэгэнд тооцогдох болжээ. Түүний бичсэн инээдэмт жүжгийн дотор 18-р зууны үеийн нийгмийн аж амьдрал нь баялаг, олон хэлбэртэй тодорхой үзэгдэж байхаас гадна, цаашид нийгмийн хөгжил ямар болох нь хүртэл ил мэдэгдэнэ.
Гольдони, инээдмийн зохиолын дотор ёс явдал ихээхэн суурийг эзэлж, нийгмийн хоцрогдож байгаа хэсгүүдэд сургамж болох, тэдний ёс журмыг цэвэр ариун болгох зорилгыг хадгалан бичдэг байжээ.
Гольдонийн комеди (инээдэмт) жүжгийн зохиол бол амьдралын үнэн байдалтай хурц утга зорилгыг агуулж мөн театрын тайзан дээр тоглоход жүжигчдийн тоглоход хөдөлгөөн байдалд тустай, үзэхэд туйлын сонирхолтой байдаг. Жишээлбэл:1786 оны 10-р сард их яруу найрагч Гёте, Италид ирж Гольдонийн жүжгийг үзээд «энэ комедийг үзэж байхад, эхлэхээс нь аваад төгстөл нь инээдэм тасрахгүй, хөгжлийн дээд сэтгэлгийг үнэхээр оргилуулан чадаж байна» гэжээ.
Гольдони бас зөвхөн зохиол бичдэг төдийгөөр хязгаарлаагүй зохиолынхоо үг тэргүүтнийг хурц, тодорхой болгох гэж ажилладаг байснаас гадна, уул зохиолыг жүжигчидтэй хийж, хэрхэн тоглох, ямар зан байдлыг илрүүлэх, зохиолын утга роль нэг бүрийн зорилго утгыг хэрхэн тогловол тодорхой болох тухай, найруулагчийн үүргийг онцгой гүйцэтгэдэг хүн байжээ.
Гольдони бол театрын түүхэнд, их өөрчлөлт эргэлтийг гаргасан хүн юм. Гольдониос өмнө театрын ажиллагаа нь амьдралын үнэн байдлаас хол тасархай, хүний сэтгэл, зан чанарыг нэг талтай нэг багаар үзүүлж тоглодог, нэгэн жүжигчин зальт хүнийг тогловол, хэвшсэн хэдэн хөдөлгөөнөө үргэлжид, жүжиг бүр дээр тоглодог, багийн комеди гэгч байжээ.
Энэ багийн комеди нь тэр үеийн Италийн хөгжлийн үе шатаас хоцрогдон өөрчлөлтийг шаардсан бөгөөд үүнийг өөрчлөхөөр хэд хэдэн хүн оролдсон боловч бүтээгүй, үүнийг Гольдони жинхэнэ өөрчилж чадсан билээ.
Гольдони багийн комедийн хэтрүүлж үнэн байдлаас тасархай байсан тоглолтыг, зөв, төлөв үнэн байдалтай тоглолт болгох, амьдрал байдлын баялаг материалыг ашиглан хэрэглэх зэрэг их өөрчлөлтийг гаргасан үнэн байдлаас үндэслэн өөрийн зохиолыг зохиодог чадварлаг зүтгэгч, зохиолч мөн учраас, тэргүүний классик зохиолчдын нэгэнд ордог юм.
эх сурвалж: 1959 оны хэвлэл "Хоёр эзний ганц зарц" номоос
Дэлгэрэнгүйг Wiki-гээс
