Артур Конан Дойл
(1859 – 1930)
Сэр Артур Конан Дойл (1859 – 1930) нь мөрдөгч Шерлок Холмсын тухай зохиолуудаараа алдаршсан, Британийн зохиолч.
Дэлгэрэнгүйг Wiki-гээс
Лондон хотын Бекер-Стрит гудамжны 109 дүгээр байшингийн хананд «Энд 1881—1903 онд алдарт мөрдөгч Шерлок Холмс амьдарч байлаа» гэсэн дурсгалын самбар байдаг ажээ.
1954 онд энэхүү самбарыг байрлуулах ёслолд олон мянган хүн оролцжээ. Шерлок Холмс гэгч нь түүхэн хүн биш бөгөөд номын хуудсаар дамжин дэлхий дахинд алдаршсан уран зохиолын баатар юм.
«Шерлок Холмст тохиолдсон адал явдал» хэмээх цувралыг зохиогч Артур Конан Дойль Эдинбург хотод төржээ.
Эдинбургийн их сургуулийг амжилттай төгссөн боловч ядуу зүдүү гэр орноо тэжээх гэж удаан хугацаагаар ажил эрж тэнэсний эцэст эмч болж, удалгүй анагаах ухааны докторын зэрэг хамгаалжээ. Чөлөөт цагаараа уран зохиол сонирхон бичсээр гучин насандаа тэр нэрд гарсан зохиолч болсон байна. Зохиолчийн анхны ном нь «Цусан мөр буюу Шерлок Холмс, доктор Ватсон хоёрт тохиолдсон явдлын тухай өгүүллэгүүд» юм.
Америкийн зохиолч Эдгар Аллан По утга зохиолын «детектив» гэдэг адал явдлыг өгүүлсэн төрлийн үндсийг тавьсан бол бие даасан төрөл болгосон хүн нь Артур Конан Дойль юм. Үйлдсэн гэмт хэргийг зураглан бичих биш, бий болсон байдал, хүмүүсийн зан чанарт нарийн шинжилгээ хийж, учирзүйн ухааны аргаар цөөн боловч баримтад тулгуурлан хамгийн оновчтой дүгнэлтэд хүрэх нь А. Конан Дойлийн бүтээсэн энэ төрлийн онцлог юм.
Шерлок Холмс бол хөрөнгөтний нийгмийн байгууллын ихэмсэг зантай, мэдлэг ухаанаар дульхан түшмэдийг саруул ухаан, уран чадвараараа давж гарсан хүмүүсийн хэв шинжит дүр юм. Тийм учраас үй олон уншигчид Шерлок Холмсыг хайрлаж гэмт хэрэгтнүүдтэй тэмцэж яваад амь үрэгдсэн түүнийг дахин амьдруулахыг зохиолчоос шаарддаг байжээ.
А. Конан Дойль Шерлок Холмсын тухай 1887 онд гаргасан анхны номоос хойш 1927 он хүртэл дөчин жилийн хугацаанд дөрвөн роман, тавь гаруй өгүүллэгийг Шерлок Холмст зориулан бичжээ.
Английн алдарт зохиолч А. Конан Дойль уран зөгнөлт нэлээд зохиол бичсэнээс «Алдагдсан ертөнц» роман нь сонирхолтой юм. Түүний «Шерлок Холмсын тухай өгүүллэгүүд», «Баскервилийн удмыг хэлмэгдүүлсэн нохой» тууж 1960—1970-аад оны үед монгол хэлээр орчуулагджээ.
Эх сурвалж : "Хүүхэд залуучуудын нэвтэрхий толь - 3" (1988 он)
