Петер Илемницкий
(1901 — 1949)
Словакийн зохиолч, кино зохиолч, сурган хүмүүжүүлэгч, сэтгүүлч, дипломат, коммунист.
Дэлгэрэнгүйг Wiki-гээс
Петр Илемницкий 1901 оны гуравдугаар сарын 18-нд Петоградад чех ажилчны гэр бүлд төржээ. Эдийн засгийн дунд сургууль төгсөөд багшилж байгаад 1921 онд Словакт шилжин сууж «Правда» сонины эрхлэгчээр ажиллаж байжээ.
Тэрээр анхныхаа бүтээл «Цасны ширхэг» (1920) «Ерэн есөн цагаан морь» (1921) гэдэг зохиолоо багшийн ажлынхаа туршлагад үндэслэн бичсэн байна.
Илемницкий 1926 онд сэтгүүлчийн мэргэжлээр Москвад суралцаад буцахдаа хот тосгонд социалист аж ахуй хэрхэн хөгжиж байгааг харуулсан сурвалжилга, мөн эдийн засгийн шинэ бодлогын үеийн орос тосгоны ангийн тэмцлийг харуулсан «Хөлийн чимээ» гэдэг тууж бичиж иржээ.
П. Илемницкий словакийн пролетари ангийн эрх ашгийг хамгаалсан утга зохиолын төлөөлөгч байв. Тэрээр зохиолынхоо сэдвийг гол төлөв дэлхийн хоёр дайны хоорондох үеийн словакийн пролетари нарын тэмцлээс авч байна. «Ялалтаар төгссөн уналт» (1929) тууж, дараа нь «Атар газар» (1932) туужаараа Кысуц голын орчим суудаг хүмүүсийн ядуу зүдүү амьдралыг дүрслэн, эдийн засгийн хямралын үеийн хот тосгоны пролетари нарын ангийн ухамсар өсөж байгааг харуулжээ. «Ширхэг ёотон» (1934) гэдэг дараачийн туужийнх нь баатрууд мөн л ядуу, зүдүү амьдралтай ажилчид, тариачид юм. Илемницкий ер нь ард түмний дүр, хамт олныг нийтэд нь чадварлагаар дүрсэлдэг юм.
Илемницкий 1942 онд нууц үйл ажиллагааны улмаас баривчлагдан, хөдөлмөрийн лагерьд хоригдож байжээ. Шоронгоос суллагдсаны дараа Гэгээрлийн яаманд ажиллаж, Ардын хурлын депутат, Москвад суугаа Чехословакийн Элчин сайдын яамны соёлын атташе зэрэг ажлуудыг гүйцэтгэж явжээ.
Эх сурвалж : "ПЕТР ИЛЕМНИЦКИЙ. САЛХИ ЭРГЭЛЭЭ. УЛААНБААТАР. 1979" номоос
