ЗЕГЕРС Анна
(1900—1981)
1928 онд «Загасчдын бослого» нэртэй тууж хэвлэгдэн гармагц уншигчдын сонирхлыг ихэд татаж, удалгүй Г. Клайстын нэрэмжит утга зохиолын шагнал хүртжээ. Бараг анхныхаа томхон зохиолоор ийнхүү алдаршсан Нетти Радван буюу хожим нь Анна Зегерс гэдэг утга зохиолын нэрээрээ алдаршсан зохиолч эмэгтэй байлаа.
Анна Зегерс бүр анхныхаа зохиолоос эхлээд шударга ёсны төлөө тууштай тэмцэгч болохоо харуулсан юм. Германд фашизм газар авч, шударга тэмцэгч уран бүтээлчдийг аюул заналхийлж байсан үед Анна Зегерс нутгаасаа дүрвэн гарч, 1947 он хүртэл буюу 14 жил Франц, Мексик оронд амьдарч фашизмын эсрэг тэмцлээ эрчимтэй өрнүүлж байлаа. Тэр гадаадад байхдаа нууц товхимол, сонин хэвлэхэд тусалж, германы ардын фронтын тэмцэгчидтэй холбоо барин ажиллаж, фашизмаас хүн төрөлхтний соёлыг хамгаалах хэд хэдэн их хуралд идэвхтэй оролцож байв. Фашизм сөнөж герман нутагт ажилчин тариачны шинэ улс байгуулагдахад Зегерс сая нутагтаа эргэн ирж уран бүтээлээ чөлөөтэй үргэлжлүүлэх бололцоотой болсон байна.
Анна Зегерсийн уран бүтээлийн үндсэн чиглэл бол коммунистуудын нугаршгүй хатан зоригийг дүрслэн гаргах явдал байлаа. Дэлхийд алдаршсан «Долоо дахь загалмай» роман хүртэлх бүх зохиолд нь коммунистуудын бэрх хэцүү амьдрал, тэдний өөдрөг бадрангуй үзэл, зорьсон үйл хэргийнхээ ялалтад бат итгэсэн чин зориг яруу тодорхой харагддаг.
Монголын уншигчид А. Зегерсийн «Үхэвч залуугаараа», «Долоо дахь загалмай» зэрэг алдарт романуудыг нь эх хэлээрээ уншиж байна.
Анна Зегерс олон жилийн турш БНАГУ-ын зохиолчдын байгууллагыг тэргүүлж байсан бөгөөд ажилчин анги, коммунистуудын тухай бичсэн шүлэг бүтээлүүдээрээ БНАГУ-ын Төрийн шагналыг хоёр удаа хүртсэн юм.
Тэр олон жилийн турш Дэлхийн энх тайвны зөвлөлийн тэргүүлэгч гишүүн байлаа. А. Зегерсийн энх тайвны төлөө шударга тэмцлийг нь үнэлж түүнд 1951 онд «Улс түмний хооронд Энх тайвныг бэхжүүлэхийн төлөө» Олон улсын Лениний шагнал олгожээ.
Анна Зегерс «Шийдвэр» гэдэг туульсын роман, «Хүн, түүний нэр» гэдэг тууж зэрэг олон бүтээлдээ дайны дараах улс орны хувь заяа, ард олны аж амьдралыг өргөн цар хүрээтэй харуулжээ.
Эх сурвалж: "Хүүхэд залуучуудын нэвтэрхий толь -3" (1988 он, УБ)
Дэлгэрэнгүйг Wiki-гээс
