Буало Депрео овогт Никола
(1636 — 1711)
Францын классицизм буюу сонгодог зохиолын урсгалын алдарт онолч, шүүмжлэгч, шог шүлэгч Буало өмгөөлөгч баян түшмэлийн гэрт төржээ. Шашны сургуулиар боловсрол олж, улмаар Сорбонны (Парисын) их сургуульд эхлээд шашны номнолынход орж, дараа нь шүүх цаазын факультетад шилжин суралцаж, мэргэжил эзэмшсэн боловч түүндээ дур гутаж, уул ажлыг хийхээс эхнээсээ татгалзсан хүн юм. Эцгийгээ нас бармагц өвийг нь өвлөн эд мөнгөний талаар бусдын гар харахгүй болмогц 1657 оноос Буало утга зохиолд биеэ бүрнээ зориулжээ.
Тэр үеэс түүний зохиосон шог зохиол (1657) жижиг шүлэг (1663) нийтлэгдэх болжээ. Жараад (1660—1670) онд Буало есөн шог бичсэний дотроос IX шогийн оршил болгож «Шог зохиолын талаар эргэцүүлсэн бодол» гэдэг шинжлэл бичиг нийтлүүлжээ.
Тэдгээр шог зохиолд язгууртны орд танхимын явцуу яруу найраг, Мадлена Скюдери хатагтайн ёсорхуу наалинхай баатарлалын роман, ихэс дээдсийн чамирхуу аяст Катоны шүлэг зэргийг элэг доог болгон зад шүүмжилдэг байжээ. Жишээ нь V шогтоо өвгөдийнхөө гавьяа, өрөөл бусдын эрэлхэг баатарлалаар биеэ гайхуулж явдаг, хонгио, хөнгөмсөг, нэрэлхүү ангалзуур язгууртныг жигшил болгон шүүмжлээд, язгууртны угсаа залгамжлах эрх ямбаны эсрэг бие хүний шударга сайн шинж чанар гэгчийн үзэл санааг сөргүүлэн тавьсан ажээ.
Буало ийнхүү дээд язгууртан, иезуитууд, ихэс хэргэмтний хуурамч сүсэг бишрэлийн эсрэг халз чиглэсэн Шог зохиол бичихийн зэрэгцээ эхлээд Мольерийг, хожим Расинийг их л өмгөөлөн дэмжиж байжээ. Гэтэл ардаа их нөлөөтэй хүмүүсийн дэмжлэгтэй боловч билиг авьяасгүй, үл ялих зохиолчдыг Буало хайр найргүй няцаан шүүмжлэх зэргээр үндэсний дэвшилтэт утга зохиолын төлөө нийгмийн харгис хүчний эсрэг тэмцэлдээ эвлэршгүй хатуу зарчимч байр суурь баримталсны улмаас утга зохиолыг удирдах бүлэг, язгууртны орд танхимын газрын аль алинд аюулт дайсан олонтой болжээ...
Дэлгэрэнгүйг Wiki-гээс
