БУНЬЯАГИЙН НАЦАГ
(1919 — 1976)
Зохиолч Буньяагийн Нацаг 1919 оны 10-р сарын 29-нд Өвөрхангай аймгийн Баруунбаян-Улаан сумын нутагт малчин ардын гэр бүлд төржээ.
1930—1932 онд бага сургууль, 1935—1937 онд Санхүү эдийн засгийн техникум, 1939—1941 онд Цэргийн дунд сургууль, 1953—1956 онд Намын боловсон хүчний дээд сургуульд тус тус суралцаж төгссөн.
Б. Нацаг 1937 оноос эхлэн худалдааны газар нягтлан бодогч, багш, зааварлагч, 1939 оноос цэрэгт дунд, ахлах офицер, 1947 оноос Улаанбаатар хотын орлогч дарга, 1949 оноос Сэлэнгэ аймгийн дарга, 1956 оноом Төв аймгийн намын хорооны нарийн бичгийн дарга, 1959 оноос МҮЭ-ийн Төв зөвлөлийн хэлтсийн дарга, Хэвлэл хянах газарт хэлтсийн дарга зэрэг ажил хийжээ. 1960-аад оны эхээр МЗЭ-ийн хороонд аж ахуйн даргаар ажиллаж байлаа.
Уран зохиолын ажлыг 1938 оноос эхлэн оролдож “Хүүхдүүдийн хороо” гэдэг өгүүллэг “Боловсон худалдаа” гэдэг сонинд анх хэвлэгдсэн нь хамгийн анхны зохиол юм. Гэвч зохиол бичих ажил нь 10-аад жил алгуурлаж 1948 оноос хойш үргэлжилсэн үгийн зохиол голлон оролдож 1962 онд “Өрнөлтийн замд” гэдэг тууж тусгай ном болж хэвлэгджээ.
1946 онд МЗЭ-д гишүүн болсон, МЗЭ-ийн эхний гурван их хуралд төлөөлөөгчөөр оролцжээ.
