Зохиолч, яруу найрагч, орчуулагч Ж.Нэргүй 1956 онд Хэнтий аймгийн Норовлин суманд төржээ. 1977 онд Минск хотын уран барилгын техникум төгсжээ. Мөн оноос Чойбалсан хотын ус ашиглалтын товчоонд мастер техникч, ерөнхий инженер, Дөл сонинд утга зохиолын ажилтан, Аймгийн радио телевизийн редакцид теле найруулагч, теле оператораар ажиллаж байжээ. 1972 онооос зохиол, шүлэг, нийтлэл бичиж эхлэсэн бөгөөд Яруу найргийн «Ялалтын симфони» (1984), «Сэтгэл хазгар биш бол…» (2005), улс төр, эдийн засгийн нийтлэлийн «Хөшүүрэг» (2004), уран сайхны хөрөг нийтлэлийн “Хүмүүсийн тухай роман” (Тэргүүн дэвтэр. 2006), “Үхэл дагуулсан сүйрлүүд” (Осол сүйрлийн бага нэвтэрхий толь. 2007) номууд болон Барон Унгерны үйл амьдралаас сэдэвлэсэн “Од шингэдэггүй” (2010) бүрэн хэмжээний кино зохиол туурвисан юм.
Ж.Нэргүй манай гарамгай орчуулагчдын нэг бөгөөд орчуулгын хөдөлмөрөө анхлан Михаил Веллерийн Авсанд хэвтээ хүн тууж /1997/, Эдуард Тополийн Кремийн эзэгтэй романаар /1998/ эхлүүлж байжээ. Тэрээр Польшийн зохиолч Фердинанд Оссендовскийн “Хүн, араатан, бурхад” (Аян замын бодрол, тэмдэглэл, 2000, 2006, 2009, 2011, 2010), “Ленин” роман (2012) Оросын марксистуудын анхдагч Г.В.Плехановын ”Социализм хэрхэн дампуурах вэ?” (Улс төрийн гэрээслэл, 2000, 2009) Орос-Америкийн зохиолч Эдуард Тополийн “Кремлийн эзэгтэй” (Раиса Максимовна Горбачевагийн тухай улс төрийн баримтат, адал явдалт роман, 1998, 2012), “Ор хөнжлийн Орос орон” (Эротик роман, 2005, 2011), Америкийн түүхч Моррис Славины “Илдэн дорхи Эберчүүд” (Францын анхны хувьсгалын түүх, бүтэц зүйн судалгааны баримтат роман, 2005), Америкийн философч, зохиолч Айн Рэндийн “Капитализмыг өмөөрөх нь” (Философийн туурвилууд, 2006), “Атлантын нуруу тэнийв” (Дэлхийн шилдэг роман, 2010), Иракийн Ерөнхийлөгч Саддам Хусейны “Забиба, хаан хоёр” (Улс төр, хайр сэтгэлийн роман, 2006), Оросын яруу найрагч, дуучин, жүжигчин Владимир Высоцкийн “Бухимдал” (Дууны шүлгийн түүвэр, 2006), Оросын яруу найрагч Сергей Есениний “Сонгомол шүлгүүд” (2009, “Сонгодог шүлгүүд”-2010), Азийн морин дивизийн штабын дарга, хурандаа Михаил Торновскийн “Монголчуудтайгаа бол би Лиссабон ч хүрнэ. БаронУнгерн” (Дурсамж, 2009, 2011), Азийн морин дивизийн комендантын дарга, дэслэгч Николай Князевын “Домогт Барон” (Дурсамж, 2010) Италийн Сэргэн мандалтын үеийн тууриудын түүвэр- “Ромео, Жульетта тэргүүтэн тууриуд” (2010), Оросын нэрт зураач, соён гэгээрүүлэгч Николай Рерихийн “Азийн зүрх” (Аян замын тэмдэглэл, 2010), Оросын нэрт аялагч Николай Пржевальскийн “Монгол, тангад нутгаар” (Аян замын тэмдэглэл, 2011, 2012). Оросын монголч эрдэмтэн И.А.Ломакинагийн “Агуу их Босуул” (13-р Далай ламын 1904-1906 онд Монголд байсан тухай архивын баримтуудаар босгосон түүхэн роман), "Алтан ордны яруу найраг" зэрэг олон сайхан бүтээлээр уншигчдынхаа оюуны цангааг тайлж явна.
эх сурвалж: https://tagtaa.mn/artist/37
