ХАШБАТЫН ТУМБАА
Хашбатын Тумбаа 1930 онд Хөвсгөл аймгийн Цагаан-Уул суманд төрсөн. 1956 онд МУИС-ийн мал эмнэлгийн факультетыг дүүргэж малын их эмчийн мэргэжил эзэмшжээ.
1972 онд ЗХУ-ын Ленинград хотын Ботаникийн хүрээлэнд “Монгол мөнх харганын биоэкологи ба токсикологийн холбогдол” сэдвээр биологийн ухааны дэд докторын зэрэг хамгаалжээ.
Дэд доктор Х. Тумбаад Малын амьдын жин нэмэгдүүлэгч биологийн идэвхт “Тарга” бэлдмэл бүтээсний учир 1994 онд Монгол Улсын төрийн соёрхол хүртээжээ.
Дэд доктор Х. Тумбаа нь “Амьтны биед ургамлын алкалоидын эсрэг дархлаа үүсэх үзэгдэл” нэртэй нээлт хийж Дэлхийн болон Монгол Улсын шинжлэх ухаанд үнэтэй хувь нэмэр оруулсан юм.
Мал эмнэлгийн хүрээлэнд Эм, хор судлалын лабораторийн эрхлэгчийн албыг 1960-1994 онд хаших хугацаанд Х.Тумбаа нь Монгол орны эмийн болон хорт ургамлын биоэкологи, хор судлал, эм судлал, Монголын ардын ба уламжлалт мал эмнэлгийн чиглэлээр 40 гаруй жил эрдэм шинжилгээний ажил гүйцэтгэн судалгааны ажлын үр дүнд “ Монгол орны алкалоидот ургамал”, “ Монгол орны эмийн ургамлын тархалт” зэрэг 30 гаруй ном товхимол, 100 гаруй эрдэм шинжилгээний өгүүлэл бичиж нийтийн хүртээл болгосны зэрэгцээ шинэ бүтээл 9, оновчтой санал 5-ыг туурвин 50 орчим техникийн баримт бичгүүдийг боловсруулан Монгол Улсын мал эмнэлгийн үйлдвэрлэлд нэвтрүүлсэн байна.
