Сэр-Од бол ардын хувьсгалын эхний жилүүдэд төрж гарсан манай билэг авьяаст залуу зохиолчдын нэг байлаа. Г. Сэр-Од 1917 онд Сэлэнгэ аймгийн Ар Баянгол суманд ядуу ард Гомбын гэр бүлд төржээ. Эцэг Гомбо нь жирийн ядуу малчин байсан ба Сэр Одыг 5 настай байхад нас нөгчсөн учир Сэр-Од нь өнчрөн хоцорч эхийнхээ хамт одоогийн Төв аймгийн нутаг “Ширээ нуруу” гэгч газрын орчим байсан Хараагийн Дар эх ламын хийдийг сахиж, аж төрөн байгаад хожим хийдээс холдон Баянголын бага сургуульд суралцан, 1934 оны хавар 17 настай төгсөж, тэр үеийн Улаанбаатар хотын оюутны сургуульд (одоогийн 16 р дунд сургууль) дэвшин суралцаж төгсгөөд түүнээс хойш багшлах ажлыг хийж байсаар 1940 онд нас баржээ.
Сэр-Од, ардын хувьсгалын мандалтын үрээр, шинэ хөгжлийнхөө шатанд дэвшсэн манай хувьсгалт утга зохиолын хөгжин цэцэглэх үйл хэрэгт оюун билэг, авьяас чадлаа дайчлан хувь нэмрээ оруулжээ. Манай дунд сургуулиудын утга зохиолын сурах бичигт хэвлэгдэн, хорь шахам жил багачууд, залуусын сэтгэлд хоногшин, сонирхлыг нь татсаар танил болсон “Хавар” “Намар”, ”Буйдан баатар” зэргийн шүлэг, найраглалуудаар нь Сэр-Одын нэрийг бид мартаагүй билээ Сэр-Од богино хугацааны дотор нэлээд зүйлийг бүтээсэн боловч түүнээс нийтлэгдсэн нь цөөн, нэр нь бүдэгхэн байгааг тэмдэглэх хэрэгтэй.
Д. Дашдорж
Эх сурвалж: "Эхийн сэтгэл" номоос
