ЛЕОНАРДО ДА ВИНЧИ
(1452—1519)
Леонардо да Винчи бол хорвоогийн ховор суу билигтний нэгэн билээ. Италийн Винчи хотод төрсөн Леонардо 14 нас хүрмэгц нэрт зураач Андреа Верроккод шавь оржээ. Тэр үед биеэсээ салгадаггүй байсан тэмдэглэлийнх нь дэвтэр уул, ус» цэцэг, жимс, мод, сөөг, сайхан охины нүүр, буурал өвгөний сахал, нүүрээ угааж байгаа муур, давхиж яваа морины хөл ер нь л юм бүхний дүрслэлээр дүүрсэн байдаг байжээ.
Ингэж хамаг бүгдийг дүрслэхдээ эцэж цуцахыг мэдэхгүй махран оролдсоны үрээр алдартай зургуудаа бүтээжээ. Леонардо мууртай тоглож байгаа хүүхдийн бүх л цуврал судалбар хийж, «Мууртай эх дагина» гэдэг зураг зурахаар бэлтгэж байв. Гэтэл яваандаа эх дагинын гарт цэцэг бариулан цэцэг рүү тэмүүлсэн булбарай жаалыг эхийнх нь өвөр дээр чөлөөтэй тайван байдлаар зурсан нь «Бенуагийн эх дагина» гэдэг алдарт зураг болжээ. Одоо Ленинградын Эрмитажид тэр зураг хадгалагдаж байна.
Леонардо Флоренц хотод 20 гаруй жил амьдран сууж дараа нь Милан хотод нүүж очжээ. Миланы захирагч Леонардог зураачаас гадна инженер, зохион бүтээгчийн хувьд бүр өндөр үнэлжээ. Түүнчлэн Леонардо сайхан дуулж хөгжимддөгөөрөө ордныхны гайхлыг төрүүлжээ.
Леонардогийн Миланд хийсэн нэг том бүтээл нь Санта Мария деле Грацие сүмийн хананд гурван жилийн турш зурсан «Нууц зоог» хэмээх Христосын тухай домогт түшиглэсэн бүтээл юм.
Леонардо гүүр, хөлөг онгоц барих, их буу сэдэх зэргээр олон шинэ зүйл зохион бүтээсэн төдийгүй, хүн сууж агаарт хөөрөх багаж хүртэл сэдэвлэж байсан байна.
Леонардо да Винчийн амьдралын сүүлийн үеийн бүтээлүүдээс хамгийн дорвитой нь «Мона Лиза» (Жоконда) юм. Энэ зурагтаа залуу бүсгүйн учиртай харц, үл мэдэг инээмсэглэл, бодлогошролыг илтгэсэн царай хийгээд далд хадгалагдсан элэглэл, гуниглалыг яруу сайхан дүрсэлж чадсан байдаг.
Леонардо да Винчи гайхамшигт уран зураач төдийгүй математик, физик, техник, одон орон, геологи, ургамал судлал, анатоми зэрэг мэдлэгийн олон салбарыг эзэмшсэн алдартай зохион бүтээгч-инженер хүн байв. Түүний зохион бүтээх гэсэн хүсэл тэмүүлэл тухайн цаг үеэсээ хол түрүүлж төмөрлөг боловсруулах зуух, цувих, нэхэх суурь машин, хэвлэх, мод боловсруулах, газар ухах машин, томоохон гүүр байгууламж, усан доогуур шумбагч завь, танкны загвар гаргаж байсан төдийгүй, хүн сууж агаарт хөөрөх төхөөрөмж, шүхрийн төслийг хүртэл сэдэж байжээ.
Суут Леонардо да Винчи бол Сэргэн мандалтын үеийн сод хүмүүсийн нэг учир Ф. Энгельсийн тодорхойлсноор оюун ухаан, зан чанар, олон талын мэдлэгээрээ аугаа их хүн байсан юм.
Леонардо да Винчи 67 насандаа таалал болсон бөгөөд 1952 онд хүн төрөлхтөн түүний мэндэлсний 500 жилийн ойг ёслон тэмдэглэсэн билээ.
Эх сурвалж : Хүүхэд залуучуудын нэвтэрхий толь - 3 (1988)
