НАВААНЦЭРЭНГИЙН ГОНЖООН
(1904—1939)
Сэлэнгэ аймгийн Сэлэнгэ сумын хүн. 17-тойдоо ардын хувьсгалтай золгож, Нийслэл хүрээ, Ленинградад цэргийн сургуульд суралцан, ардын цэргийн сургагч, сэтгүүлч, аймгийн дарга. Ардыг гэгээрүүлэх ба Эрүүлийг хамгаалах яамны сайдын алба хашиж, нам төрийн удирдах байгууллагын гишүүнээр сонгогдож байв. Тэр нь ардын хувьсгалын ололтыг бэхжүүлэх түмэн олноо гэгээрүүлэх, эрүүлжүүлэх үйлсэд мэдлэг чадвараа зориулж явлаа.
Ардыг Гэгээрүүлэх ба Ардын эрүүлийг хамгаалах яам нэгдаж 1934-1935 оны хооронд найман сар ажилласан бөгөөд энэ хугацаанд тус яамыг тэргүүлэн ажиллаж байжээ.
Түүний шүлэг зохиолууд нь гучаад оны сонин сэтгүүлүүдэд нийтлэгдэж байжээ. 35 настайдаа эсэргүү хэмээх аймшигт хэрэг тулгуулан цаазлуулсан юм. Хожим түүнийг магадлан шалгаад, Улсын дээд шүүхийн бүгд хурлаар бүрэн цагаатгажээ.
