(1916-1998)
Бережков Валентин Михайлович бол олон улсын асуудлаар мэргэжсэн сэтгүүлч, долоон хоног тутам гардаг гадаад улс төрийн «Новое время» сэтгүүлийн ерөнхий эрхлэгчийн орлогч юм. 1940—1945 онд дипломат ажил хийж, олон улсын уулзалт, хэлэлцээнд нэлээд удаа оролцож явсан. 1940 оны арван хоёрдугаар сараас эхлэн Зөвлөлт Холбоот Улс руу гитлерийн Герман довтлох хүртэл ЗСБНХУ-аас Берлинд сууж байсан элчин сайдын яамны нэгдүгээр нарийн бичгийн даргаар ажиллаж байлаа. Москвад буцаж ирээд ЗСБНХУ-ын Гадаад явдлын яамны төв аппаратад зөвлөхийн зэрэгтэй ажиллаж, 1943 онд болсон гурван гүрний Москвагийн бага хурал болон гурван их гүрний тэргүүн нарын Тегераны бага хурал зэрэг зарим бага хурал, уулзалтад оролцсон, мөн 1944 онд Нэгдсэн Үндэстний Байгууллагын дүрмийн үндсийг боловсруулсан Думбартон-Оксын хэлэлцээнд очсон зөвлөлтийн төлөөлөгчдийн бүрэлдэхүүнд оролцсон юм.
Дайн төгссөний дараа, 1945 онд сэтгүүлчийн ажилд шилжээд олон улсын зөвлөгөөнүүдэд тусгай сурвалжлагчаар явж Москвагийн эдийн засгийн бага хурал, Энэтхэг-Хятадын асуудал хэлэлцсэн Женевийн бага хурал, Варшавын гэрээнд үсэг зурсан Варшавын зөвлөгөөн, дээд тушаалтны Женевийн уулзалт зэргийн ажиллагааны тухай сурвалжлан бичиж байлаа. Мөн «Новое время» сэтгүүлийн тусгай сурвалжлагчаар АНУ, Англи, Франц, Хятад, Бельги, Унгар, Болгар, Югослав, ХБНГУ, Канад зэрэг орноор явсан юм. Валентин Бережков, хэд хэдэн номоос гадна өгүүлэл, сурвалжилга, найруулал, замын тэмдэглэл олныг бичжээ.
В. Бережковын «Дипломат ажлаар Берлинд. 1940—1941» гэдэг ном Зөвлөлт Холбоот Улсад болон гадаадад уншигчдын сонирхлыг ихээр татжээ. Энэ номыг анх 1965 оны зун «Новый мир» сэтгүүлд нийтлээд дараагаар нь тусгай дэвтэр болгон Зөвлөлт Холбоот Улс, Итали, Финлянд, Япон, Иран, Чехословак, Унгар, Польш , Югослав, Өрнөд Герман болон БНМАУ-д хэвлэсэн байна.
