ЭРЭНЦЭНГИЙН ПҮРЭВ
(1909—1937)
Өвөрхангай аймгийн Баруун Баян-Улаан сумын Өшгөг нутгийн хүн бөгөөд багадаа нутгийнхаа бичигтнээр заалгаж бичигтэн болжээ. 18 настайдаа нам ба улсын төв сургуульд сурч, улмаар нам залуучуудын байгууллагад, аж үйлдвэрийн комбинатад ажиллаж байлаа. Олонд Улаан Пүрэв гэж алдаршив. Хориод оны эцсээс уран зохиолч нарын бүлгэмд хичээллэж, шүлэг зохиолоор авьяасаа сорьж явжээ. Түүний бичсэн шүлэг, зохиол гучаад оны сонин сэтгүүлд нийтлэгдэж байв. Э. Пүрэв «Баттай хөрөнгө» жүжгийн зохиолоороо ардын хувьсгалын 15 жилийн ойд зориулсан уран бүтээлийн уралдаанд шалгарч, улсын эрхэм уран зохиолч цол хүртжээ. Тэр нь эх орон ард түмнээ гэсээр яваад 1937 онд аж үйлдвэрийн комбинатыг шатаасан хэрэг тулгуулан 28-хан настайдаа цаазлуулжээ. Нэг хүнийг тахин шүтэхийн хор уршгийг шүүмжлэн илрүүлсний дараагаар уг хэрэг гэгчийг нэхэн шалгаж, гүтгэлэг байсныг магадлан тогтоогоод цагаатгажээ.
