Хенрик Иохан Ибсен
(1828–1906)
Норвегийн жүжгийн зохиолч. Дэлхийн хүүрнэлт жүжгийн онол зүйн хөгжилд үлэмж нөлөөг үзүүлэн, нийгэм-сэтгэлзүйн жүжгийн шинэ хандлагыг төлөвшүүлсэн хэмээн урлаг судлаачид үнэлдэг.
Дэлгэрэнгүйг Wiki-гээс.
Г. ИБСЕН
(1828—1906)
Дэлхийн жүжгийн зохиолын сонгодог төлөөлөгч Генрик Ибсен, Норвег улсын Шина хотод худалдаачны гэр бүлд төржээ. Тэр бүр оюутан болохоосоо өмнө хошин, шог сонины идэвхтэй хэвлэн нийтлэгч байв. 19-р зууны дунд үеэс уран бүтээлийнхээ замыг эхэлж, 1848—1849 онд болсон Унгарын хувьсгалын баатруудад зориулсан шүлэг найраглал бичиж байлаа.
23 настайдаа Бергинскийн үндэсний театрын удирдагчаар ажиллаж байгаад, Христианы үндэсний театрыг толгойлох болжээ.
1862 онд хөрөнгөт нийгмийн зан суртахууныг илчилсэн «Дурлалын комеди» гэдэг яриан жүжгээ хэвлүүлэхэд үзэгчид, утга зохиолын онолчид, шүүмжлэгчдийн ширүүн эсэргүүцэлтэй тулгарсан бөгөөд тэдний зарим нь жүжгийн зохиолчийг шүүн цээрлүүлэхийг хүртэл шаардаж байжээ. Тэр үеийн Норвегийн засгийн газрын улс төрийн бодлогын хямрал, аж амьдралын хүнд хэцүү байдал, өөрийнх нь үзэл бодлыг ойлгохгүй байсан зэргээс шалтгаалан, зохиолч Эх орноо орхин гарч гуч гаруй жил гадаадад цагаачлан амьдарч яваад 1891 онд буцаж иржээ.
Г. Ибсений бүх уран бүтээлд хөрөнгөтний бэртэгчин зан суртахууныг шүүмжлэн гаргасан байдаг. Түүний жүжгийн олон баатрууд нийгмийн тэгш биш байдлын эсрэг тэмцэгч, үнэнч шударга хүмүүс бөгөөд эцэстээ ганцаардан эмгэнэлт байдалд ордог байна.
1877 онд бичсэн «Нийгмийн тулгуур» гэдэг яриан жүжигтээ өндөр ёс суртахуунтай, шулуун шударга зантай Берникийн дүрийг бүтээжээ. 1879 онд туурвисан «Хүүхэлдэйн байшин» жүжиг нь дэлхийн улс орны бараг бүх театрын тайзнаа тавигдаж үзэгчдийн сонирхлыг гойд татсан бүтээл болжээ. Жүжгийн гол баатар Нора Хельмер бүсгүй «хүүхэлдэйн амьдралаар» амьдардаг. Уг жүжигтээ эмэгтэйчүүдийн тэгш эрхийн асуудлыг хөндөж тавьсан билээ. 1880-ад онд бичсэн «Хоосон сүг» жүжигтээ хөрөнгөтний гэр бүлийн амьдралын ялзралыг тусгасан бол «Ард түмний дайсан» жүжигтээ тэр үеийн нийгмийн засаг захиргааны үнэн нүүр царайг уудлан илчилсэн юм.
Манай театрын тайзнаа Г. Ибсений «Хүүхэлдэйн байшин» жүжгийг «Нора бүсгүй» нэртэйгээр тавьж, уг зохиолыг монгол хэлээр тусгай ном болгон хэвлэн нийтэлсэн байна.
эх сурвалж : Хүүхэд залуучуудын нэвтэрхий толь - 3 (1988 он)
