Том хэмжээний шүлэглэсэн туульс зохиол бүтээлийг хөгжмийн аялгуунд хайлдаг хүнийг туульч гэдэг бөгөөд үүний эртний төлөөлөгч нь Бага Азийн сохор дууч гэж алдаршсан Эртний Грекийн их туульч Гомер юм. Түүний мэндэлсэн, таалал болсон он, намтар түүх төдий л тодорхойгүй. Бүүр түүр мэдээ байвч тэр нь үнэмшил багатай. Жишээ нь нэгэн түүхийн баримтад өгүүлэхдээ: дээр цагт Грекийн долоон хот улс Гомерийн төрсөн хот болох гэж тэмцэлдэж байсан гэж бий. Зарим судлаачид Гомерийг МЭӨ XII зууны үед амьдарч байсан гэж үздэг байхад зарим нь МЭӨ VII зуунд гэж таамагладаг.
Гомер Эртний Грекийн уран зохиолын хамгийн эртний дурсгал болж үлдсэн «Илиад», «Одиссей» гэдэг хоёр алдарт тууль бичиж үлдээжээ. Энэ хоёр зохиол тус бүр 24 дуулалтай. «Илиад» 15693 шад, «Одиссей» нь 12110 шад шүлгээс бүрддэг.
Бага Азийн Трой хотыг грекчүүд байлдан эзлэх гэж арван жил дайтсан тухай «Илиад»-д гардаг бол, «Одиссей»-д дээрх дайн тулалдааны дараа Грекийн дайчин эрс эх нутагтаа буцах замд тохиолдсон элдэв сонин учралыг өгүүлнэ.
«Илиад» туульд чин зоригтой, ариун цагаан сэтгэлт Ахиллес, суу зальт баатар Одиссей, төрсөн хотдоо хязгааргүй хайртай, энэрэнгүй сэтгэлт Гектар зэрэг сайхан дүр олон бий.
«Одиссей» туульд хүч хүрэхгүй газар арга ухаан зарж, бэрх аюулаас мултран гарсан Одиссейн суу бэлгэ, түүний үнэнч гэргий Пенелопагийн мэргэн ухааныг магтан дуулсан байдаг.
Эртний грек түмний цэцэн билгийн толь болон мөнхөрсөн Гомерийн туульсийн «энэ дайнаас эсэн мэнд эх нутагтаа буцах сан та минь!» гэсэн энэ үг манай гарагийн энхийг эрхэмлэгч эгэл цэрэг эрсийн дайныг жигших чин сэтгэлийн үг болж эгнэгт цуурайтсаар ирсэн билээ.
