Цогдогийн ЦЭДЭНДАМБА
Ц. Цэдэндамба нь 1940 онд Баянхонгор аймгийн Галуут сумын Нурамтын оргил гэдэг газар төржээ. 1948―1958 онд Баянхонгор аймгийн төвийн 10 жилийн дунд сургууль, 1958―1962 онд МУИС-ийн хэл, түүхийн факультетыг тус тус төгсжээ.
Тэр бээр 1962―-1975 онд МУИС-д багш, 1967―-1970 ЗХУ-ын ШУА-ийн хэл шинжлэлийн хүрээлэнгийн аспирантурт суралцаж хэл шинжлэлийн ухааны дэд эрдэмтний зэрэг хамгаалжээ.
1975―1981 УБДС-д тэнхимийн эрхлэгч, 1981―1989 онд Политехникийн дээд сургуульд тэнхимийн эрхлэгчээр тус тус ажилласан бөгөөд 1985―1988 онд ЗХУ-ын ШУА-ийн докторантурт суралцаж хэлбичгийн ухааны докторын зэрэг хамгаалсан байна.
1989―1991 онд ШУА-ийн хэл зохиолын хүрээлэнд секторын эрхлэгч, 1991―1994 Парисын Дорно дахины иргэншлийн үндэсний дээд сургуульд монгол хэлний багш, 1996―2001 онд ШУА-ийн Хэл зохиолын хүрээлэнд эрдэм шинжилгээний тэргүүлэх ажилтнаар ажиллажээ.
Ц. Цэдэндамба 1985 онд доцент, 1995 онд профессор цол хүртсэнээс гадна “Ардын боловсролын тэргүүний ажилтан”, “Шинжлэх ухааны тэргүүний ажилтан” зэрэг цол тэмдэг, Хөдөлмөрийн гавьяаны улаан тугийн одон, Ардын хувьсгалын 50, 60, 70 жилийн ойн медалиудаар шагнагдсан байна.
Зохиол:
Хомерийн туульс. 1974.
Орчуулга:
Ли Чуань Лун. Эрвээхэй. «Ходөлмөр» сонин. №4. 1962.
Кришан Чандра. Жара Жари хоёр. «Цог» сэтгүүл. 1965.
Гиде Мопассан. Милон өвөө « Хөдөлмөр» сонин. №1271.1966.
Гиде Мопассан. Зэрэмдэг үрсийн эх. «Хөдөлмөр» сонин. 1966.
Б. С. Житков. Өгүүллэгүүд. 1982.
Эх сурвалж : Монгол улсын их сургуулийн Гадаад хэл соёлын сургууль эмхэтгэн гаргасан "Манай эрдэмтэд" (УБ., 2010 он) номоос
