Шарль Луи де Секонда де ля Бред и де Монтескье
(1689 — 1755)
Францын зохиолч, эрхзүйч, гүн ухаантан, либерализмын үзэл санааг эхлүүлэгчдийн нэг. Засаглалын хувиарлалтын онолыг үндэслэгч.
Дэлгэрэнгүйг Wiki-гээс
Шарль Луи де Секонда де ля Бред и де Монтескье (1689-1755) бол Францын сэцэн мэргэн соён гийгүүлэгч, суут эрдэмтэн, түүхч, социологич, хуульч, уран зохиолч бүлгээ. Энэ хүний агууг зөвхөн энэ хэдэн гуншнаар таниулах аргагүй нь мэдээж. Шарль Монтескье нийгэм-улс төрийн хийгээд гүн ухааны асуудлыг нэлээд нударгатай боловсруулж байсан юм. Их олон талтай сэтгэгч энэ хүн бүтээл юугаа туурвихдаа Сэргэн мандлын болон XVII зууны гүн ухаан-хүмүүнлэг ёсны их өв санд тулгуурлаж Гэгээрлийн хөдөлгөөний зарчмыг боловсруулахад чамлахааргүй хувь нэмэр оруулжээ. Нийгмийн түүхэн хөгжлийн зүй тогтлыг авч үзэхдээ хувь тавилан, санамсаргүй тохиолдол бус зүй ёсны учир шалтгаан түүхийн үйл явцыг нөхцөлдүүлдэг гэдгийг нотолж байсан юм. Чингэхээр түүх бол түүний хувьд зүй тогтолт үйл явц байлаа. Бүхий л амьдралынхаа туршид Монтескьегийн шастирууддаа нотолсон олон асуудал анх «Перс захианууд» (1721) гэдэг захидлын маягаар бичсэн гүн ухааны романд нь тусаж билээ.
1988 онд швейцар эрдэмтэн Лүи Деграв Монтескьегийн бүх бүтээлийг шүүж үзээд нийтдээ 3273 нэр ус гарч байна гэж мэдээлжээ. Тэгэхээр энэ суут эрдэмтэн зохиолч олон үеийн үй түмэн мэргэдийн зохиол туурвилыг эх сурвалж болгож байсан нь тодорхой.
Монтескьегийн бичсэн гүн ухаан, нийгэм-улс төрийн сэдэвтэй гучаад шастир бий.
Академич Ж. Амарсанаа
