Арилдийн Шархүү
(1936 - 2023)
А. ШАРХҮҮ 1936 онд Сүхбаатар аймгийн Халзан суманд төрсөн.
Монгол улсын их сургууль, ОХУ-ын Шинжлэх ухааны Академийн Хэл шинжлэлийн хүрээлэнгийн аспирантурыг тус тус төгссөн. Орос хэл, уран зохиолын багш мэргэжилтэй.
1959 оноос эхлэн МУИС, Гадаад хэлний дээд сургууль, Хүмүүнлэгийн ухааны их сургуульд багш, тэнхимийн эрхлэгч, орлогч захирал, эрдмийн зөвлөлийн эрдэмтэн нарийн бичгийн дарга, докторын сургалтын салбарын эрхлэгч зэрэг алба хашиж байсан.
Дэд эрдэмтэн, профессор цолтой.
“Монгол хэлний нөхцөлт үг, түүний хэлхэцийг орос хэлний холбогдох зүйлтэй зэрэгцүүлэн судлах нь ” сэдвээр 1971 онд ОХУ-ын Москва хотноо хэлбичгийн ухааны дэд эрдэмтний зэрэг хамгаалсан.
А. Шархүү нь Орос Зөвлөлтийн болон Өрнөдийн сонгодог зохиолчдын бүтээл туурвилаас орчуулан ард түмний хүртээл болгосноос гадна хэл шинжлэл, уран зохиолын онолоор 60 гаруй эрдэм шинжилгээний өгүүлэл бичиж нийтлүүлжээ. Оросын болон дэлхийн шилдэг уран зохиолыг олон жил их дээд сургуульд зааж, нэр төртэй олон шавь нарыг төрүүлж ирсний зэрэгцээ эрдэм судлалын чамбай бүтээлүүд туурвиж, гадаадын сонгодог зохиолчдын бүтээлээс өргөн олон уншигчдын хүртээл болгоход жинтэй хувь нэмэр оруулсан хэл шинжлэлийн томоохон эрдэмтэн, орчуулагч байсан юм.
1999 онд Монгол Улсын Гавьяат багш цол хүртсэн.
