Яруу найрагч, үргэлжилсэн үгийн зохиолч, сэтгүүлч ГЭНДЭНГИЙН СЭСМЭЭ 1935 онд Булган аймгийн Бүрэгхангай сумын нутагт малчин ардын гэр бүлд төржээ.
1955 онд Улаанбаатар хотноо багшийн сургууль, 1960 онд Марксизм-Ленинизмийн оройн дээд сургууль, 1964 онд МУИС-ийн сэтгүүлчийн ангийг тус тус төгсжээ.
Уран зохиолыг 1958 оноос эхлэн оролдож өсвөр үеийнхний хүмүүжил, зан суртахууны төлөвшлийн сэдвээр голлон хүүхдийн олон зохиол бичиж «Эрдэм сурсан нь» (1958), «Хув ишиг» (1958), «Тоглоомууд яагаад зугтаа вэ?» (1963), «Малчны жаалууд» (1963), «Хонины хишиг» (1966), «Хурын шим» (1967) зэрэг хүүхдийн шүлэг, өгүүллэгийн ном хэвлүүлжээ.
Г. Сэсмээ Монголын Зохиолчдын Эвлэлийн гишүүнд 1967 онд элсжээ.
