ЦАХИМ НОМ

ЛИ БО

ЛИ БО 
(701—762)

Хятадын нэрт яруу найрагч Ли Бо 5 наснаасаа гэрээр бичиг заалган сурч, анхны уран бүтээлээ 7 настайдаа бичсэн гэдэг. Хориод настайдаа аглаг уулын агуйд суун, Хятадын нутгаар хэрэн хэсэж явах болсноор түүний амьдралын аялал-явуулын үе эхэлсэн байна. Ийнхүү олон газар нутгаар явж янз бүрийн хүмүүстэй уулзан учирсан нь түүний үзэл бодол төлөвшин тогтоход болон уран бүтээлийн нь өсөлт хөгжилтөд нөлөөлжээ. Энэ үедээ «Сарны дуу» хэмээх алдарт зохиолоо туурвисан байна. Ли Бо зүүн зүг Вей-Ян гэдэг газраар аялан явахдаа ядуучуудад гучин түмэн лан алт зарав хэмээн бичсэнээс үзэхэд, тэр хөрөнгө чинээтэй баян худалдаачны гэрт өсөн бойжиж эд баялгаар дутахгүй амьдарч байсан боловч ядуу доорд хүмүүсийн амьдрал байдлыг мэдэж тэднийг энэрэн тэтгэхийг боддог, тэдэнтэй хүсэл сонирхол нийцдэг дэвшилтэт үзэлтэй хүн байсныг гэрчилнэ.

Түүний бичсэн «Шар мөрний ус тэнгэрээс эх авсан», «Толгой дахь цагаан үс 3000 хүрэв» зэрэг зохиолууд нь их алдаршсан юм.

Ли Богийн зохиолыг ард түмэн шагшин магтаж, түүний аж амьдрал, зан төлөвтэй холбогдсон олон домог зохиолыг ам дамжуулан хэлэлцсээр иржээ.  Хятадын эртний зураачид түүний амьдралтай холбогдсон олон зураг зурж бүтээжээ.  Энэ бүхнээс үзэхэд Ли Бо ард түмний хайр талархлыг хүлээсэн авьяаслаг зохиолч байжээ.

Хятадын нутгаар хэрэн аялж явахдаа ямар ч хаад ноёдын урилгыг хүлээж авдаггүй байсан бөгөөд шүлэг зохиолоо бичихдээ эртний шүлэгчдийг ч дуурайхгүй, тэр цагийнхаа элдэв хэлбэр маягт ч хашигдахгүй, өөрийн гэсэн өнгө аясаар туурвиж байлаа.

Феодалын бурангуй нийгмийн харгис ёсыг үзэл бодлоороо мэдэрч тухайн цаг үеийнхээ нийгмийн байдлыг тод томруун тусган харуулсан түүний 900 гаруй уянгын шүлэг хадгалагдаж үлдсэн юм.

Эх сурвалж "Хүүхэд залуучуудын нэвтэрхий толь - 3" (1988 он)

Зохиолч (орчуулагч)-ийн номууд

Өнөөдөр: 5782
Сүүлийн 7 хоног: 54952
Сүүлийн 1 сар: 253813
Нийт хандалт: 9593298