СОСОРБАРАМын ЭРДЭНЭМААМ
С. Эрдэнэмаам 1953 онд Баянхонгор аймгийн Жинст сумд төрсөн.
1971 онд Баянхонгор аймгийн төвийн 10 жилийн дунд сургууль, 1972 онд ЗХУ (хуучин нэрээр)-ын Эрхүү хотын улсын их сургуулийн бэлтгэл факультет, 1977 онд М. В. Ломоносовын нэрэмжит Москвагийн улсын их сургууль, 1995 онд Москва хот дахь А. С. Пушкины нэрэмжит Орос хэлний институтийн аспирантурыг эчнээгээр тус тус төгссөн.
“Хэл судлаач. Орос хэл, уран зохиолын багш” мэргэжилтэй, хэл бичгийн ухааны доктор (Ph. D)-ын зэрэгтэй, профессор цолтой.
2007 онд Монгол улсын Боловсролын шинжлэх ухааны академийн жинхэнэ гишүүнээр сонгогдсон. БШУЯ-ны дэргэдэх ЕБС-ийн сурагчдын орос хэлний олимпиадыг зохион байгуулах дэд хорооны гишүүн, Боловсролын үнэлгээний төвийн тест боловсруулах багийн эксперт. МУБИС-ийн Нийгэм-хүмүүнлэгийн ухааны сургуулийн Эрдмийн зөвлөлийн гишүүн.
1977-1981 онд Монгол улсын их сургуульд багш, 1981-1987 онд БНМАУ-ын Сайд нарын Зөвлөл (хуучин нэрээр)-ийн орлогч даргын нарийн бичгийн дарга, 1987-1989 онд МАХН-ын Төв Хорооны Үзэл суртлын хэлтэст зааварлагч, 1989-1991 онд А. С. Пушкины нэрэмжит Орос хэлний институтийн Улаанбаатар хот дахь салбарын орлогч захирал, 1991-1992 онд Боловсролын яамны боловсролын мэргэжлийн хяналтын албаны улсын байцаагч, 1992-1995 онд Хөгжмийн коллежийн захирал, 1995 оны 3-аас 8-р сар хүртэл Монгол-Оросын хамтарсан дунд сургуулийн захирал, 1995-1996 онд Боловсролын яамны дэргэдэх Эрдмийн зэрэг, цол олгох дээд зөвлөлийн эрдэмтэн нарийн бичгийн дарга, 1996 оноос одоог хүртэл МУБИС-ийн Гадаад хэлний сургууль, Нийгэм-хүмүүнлэгийн ухааны сургуульд орос хэлний тэнхимийн эрхлэгч, зөвлөх профессороор ажиллаж байна.
С. Эрдэнэмаам ийнхүү удирдах дээд байгууллага, дунд, дээд боловсролын салбарт тасралтгүй 44 жил ажиллахдаа бүх шатны сургуулийн орос хэлний багш бэлтгэх, тэдний мэдлэг боловсролыг дээшлүүлэх, ЕБС-ийн сурагчдын орос хэлний улсын олимпиадыг зохион байгуулах, Монголын орос хэл, уран зохиолын багш нарын холбооны үйл ажиллагааг орчин үеийн шаардлагын хэмжээнд удирдах, эрхэлж буй тэнхимийн багш нарыг эрдэмжүүлэх, сургалтын төлөвлөгөө, хичээлийн хөтөлбөрүүдийг цаг үедээ нийцүүлэн шинэчлэн боловсруулах, орос хэлний мэргэжлийн ангийн оюутны хэл-орон судлалын дадлагыг ОХУ-д үр дүнтэй хийлгэх зэргээр эрхэлсэн ажилдаа бүхий л мэдлэг чадвар, зохион байгуулах авьяасаа дайчлан үр бүтээлтэй ажиллаж буй манай шилдэг тэргүүний эрдэмтэн-багш нарын нэг юм.
С. Эрдэнэмаам эрдэм шинжилгээний ажил гүйцэтгэж, нийгмийн хэл шинжлэлийн салбарт нэг сэдэвт зохиол 3, ном, сурах бичиг, гарын авлага 10 гаруйг туурвин, эрдэм шинжилгээний өгүүлэл, илтгэл олон арвыг бичиж дотоод, гадаадад нийтлүүлсэн судлаач-эрдэмтэн билээ.
Монгол улсад орос хэлний мэргэжилтэн бэлтгэх, орос хэлийг заах, түгээн дэлгэрүүлэх үйлсэд оруулж буй их хувь нэмрийг нь үнэлж, Олон улсын орос хэл, уран зохиолын багш нарын холбоо 2002 онд Вашингтон хотноо хуралдсан Ерөнхий Ассамблейнхаа шийдвэрээр түүнийг байгууллагынхаа дээд шагнал - “А. С. Пушкины нэрэмжит Алтан медаль”-иар шагнасан ба ОХУ-ын Буриадын улсын их сургууль 2003 онд, Новосибирскийн Улсын багшийн их сургууль 2013 онд, Эрхүүгийн Улсын их сургууль 2018 онд түүнд “Хүндэт профессор” цолоо тус тус хүртээсэн юм.
С. Эрдэнэмаам орчуулга сонирхон оролдож, орос хэлнээс роман, тууж, өгүүлэл, уран сайхны болон баримтат кино 40 гаруйг орчуулсны дотор Оросын нэрт зохиолч А. Лихановын “Миний генерал” хэмээх өсвөр насны хүүхдэд зориулсан романыг 1982 онд орчуулан нийтийн хүртээл болгосон нь 2005 онд дахин хэвлэгдсэн төдийгүй БСШУЯ-наас батлан гаргасан ЕБС-ийн сурагчдын заавал унших номын жагсаалтад орсон юм.
Түүний орчуулсан уран сайхны киноноос “Дүнсгэр мөрөн”, “Нисдэг Честмир”, “Валентин, Валентина хоёр”, “Хонгорхон Зинуля”, “36-80-ын хавтгайд тохиолдсон явдал” зэрэг олон киног үе үеийн өсвөр насныхан төдийгүй насанд хүрэгчид сонирхон үзсэн билээ.
