Дарийн Бадамням
Сэтгүүлч, орчуулагч Дарийн Бадамням 1934 онд Дорнод аймгийн Дашбалбар сумын нутагт төржээ.
1944—1954 онд Дашбалбар сумын бага сургууль, Чойбалсан хотын 10 жилийн 1 дүгээр дунд сургуулийг дүүргэж, МУИС-ийн орос хэлний ангийг төгссөн байна.
Д. Бадамням хөдөлмөрийн гараагаа дунд сургуулийн багшийн ажлаар эхэлж, улмаар дээд сургуульд багшилж байгаад 1968 оноос эхлэн «Зөвлөлт Холбоот Улс» сэтгүүлийн орчуулагч, редактор, нарийн бичгийн даргаар 30 шахам жил ажиллажээ.
Д.Бадамням эрхэлсэн ажлын зэрэгцээгээр
Читийн зохиолчдын шилдэг бүтээлийн түүвэр «Ингэдэйн урсгал»,
Мухтар Ауэзовын «Дэгжих үйлстэн»,
Валентин Катаевын «Урагш цаг»,
Борис Могиаевын «Эрчүүд ба эхнэрүүд» зэрэг 10 гаруй роман,
Жамсрангийн Цэвээний «Ордос дахь Чингис хааны онгон», Цыбаков Гомбожавын «Монгол, Төвөдөөр зорчсон тэмдэглэл»,
Ш. Бираагийн «Монголын түүх бичлэг» (ХIII—ХVII зуун),
Сэндберг Карлын «Абрам Линкольн»,
Жувейни Ала ад-Дин Ата Маликийн «Чингис хаан: дэлхийг байлдан дагуулагчийн түүх»,
Валентин Зорины «Нэхэн дурсахуй»,
С. Л. Козминий эмхэтгэсэн «Барон Унгерны тухай баримт бичгүүд ба дуртгалууд» зэрэг нийтдээ 30 гаруй ном орчуулсан байна.
Д.Бадамням Монголын төрөөс “Хөдөлмөрийн хүндэт медаль”, Оросын холбооны Буриад улсаас “Соёлын Гавьяат Ажилтан” цол хүртжээ.
Эх сурвалж: “Л.НОРОВСҮРЭН “СЭТГҮҮЛ ЗҮЙ” (21 боть зохиол)-ийн VII боть “МОНГОЛЫН СЭТГҮҮЛЧИД-1”-ээс
