СВИФТ Ж.
(1667—1745)
Английн соён гэгээрүүлэгч, их бичгийн хүн Жонатан Свифт Дублин хотноо ирландын жижиг түшмэлийн гэрт төржээ. Багадаа өнчирсөн учир өвөг эцгийнхээ асрамжид өсөж хүмүүжжээ. Сургууль төгсөөд хэдийгээр өөрөө дургүй байсан ч гэсэн Дублиний их сургуулийн шашны факультетад оржээ. Дараа нь Англид очиж Вильям Темпл гэгч түшмэлийн нарийн бичгийн даргаар ажиллажээ.
Гэвч Свифт баячууд, ихэс дээдэстэй удаан нийцэн ажилласангүй. Түүнийг Лондоноос зайлуулах гэж Ирланд руу явуулжээ. Тэр Дублинд очиж нэгэн цогчин дуганы хамба лам болжээ. Свифт өөрийн ард түмний гуйланч зүдүү амьдрал, гуниг зовлонг зүрх шимшрэн мэдэрч, англичуудаас Ирландад тогтоосон колоничлолыг үзэн ядаж, шоглон бичиж байсан тул ард түмний дунд алдаршжээ.
Түүний бичсэн хошин шог зохиол баячуудын айдсыг төрүүлжээ. Одоо хүртэл Ватиканы хаалттай номын жагсаалтад орсон «Торхны үлгэр», ирландчуудыг эрхийнхээ төлөө тэмцэхийг уриалан дуудсан «Цэмбэчний захиа» гэдэг цуврал памфлетаа тэр үед бичжээ. «Цэмбэчний захиа» гэдэг энэ номыг бичсэнээс болж Свифт баривчлагдаж байв.
Ж. Свифт 59 насандаа 1726 онд «Гулливерийн аялал» гэдэг хошин роман бичсэн юм. Зохиолын гол баатар Гулливер мэс засалч, дараа нь хэд хэдэн хөлөг онгоцны ахмад болж, янз бүрийн орноор аялж гайхалтай сонин зүйл үзжээ. Тэр сонин хачин аяллынхаа үеэр одой хүмүүс, аварга хүмүүсийн орон болон үзэшгүй муухай явдлаар дүүрсэн өөр хоёр орныг үзсэн байна. Свифт тэр зохиолдоо өндөр өсгийтэй гутал өмсөх үү, намхан өсгийтэй гутал өмсөх үү хэмээн маргалдсан улс төрийн хоёр намын дайсагнасан ажиллагааг элэглэж, өндөгний аль талаас нь хагалах вэ? гэдэг өчүүхэн асуудлаас үүссэн хоёр гүрний дайныг шоглон бичсэн байна. Одой хүмүүсийн оронд утсан дээр гарамгай бүжиглэж чаддаг хүнд төрийн дээд эрх тушаал ногдож, хөндлөн модон дээгүүр харайж гарах буюу түүний доогуур шурган гарч чадсан хүн эрэлхэг, баатарлагийн жишээ болж хүндлэгдэж байгаа зэрэг нь тухайн үеийн Английн нийгмийг хошигносон хэрэг байв. «Гулливерийн аялал» роман бол ард түмнийг харанхуй бүдүүлэг байлгахыг эрмэлзэн, тэднийг тонон дээрэмдэгчид, шударга бус дайн дэгдээгчдийн эсрэг чиглэсэн хошин шог зохиол юм.
Гурван зуу шахам жилийн турш дэлхийн олон улс орны хэлээр хэдэн арван сая хувиар хэвлэгдэн гарч, багачууд хүүхдийн бахархан унших зохиолын нэг болсон Ж. Свифтийн «Гулливерийн аялал» роман монгол хэлэнд гучаад оны үеэс орчуулагдаж, гурван удаа хэвлэгджээ.
Эх сурвалж : Хүүхэд залуучуудын нэвтэрхий толь - 3 (1988)
