Тарас Григорьевич Шевченко
(1814 — 1861)
Украины яруу найрагч, зохиолч, сэтгэгч, зураач, угсаатны зүйч, нийгмийн зүтгэлтэн.
Дэлгэрэнгүйг Wiki-ээс
Украины их яруу найрагч Тарас Григорьевич Щевченко 1814 онд Киевийн губерний Моринцы тосгонд төржээ. Шевченкогийн эх эцэг нь хамжлагын тариачид байсан бөгөөд аж амьдралаар маш ядуу зүдүү байжээ. Тарас Шевченкогийн эх есөн настайд нь нас барж, түүнээс хойш хоёр жил болоход эцэг нь нас барж гав ганцаараа өнчрөн хоцорсон юм.
Тарас тэр үеийн сургуулийн багш гэгдэгч согтуу галзуу хүмүүсийн зарц болж зодуулж нүдүүлж явахдаа бичиг үсэг сурч авчээ. Тэр цагт түүний байгаа тосгоноор тэнэмэл дууч хуурч нар ирж Украин түмний баатарлаг үйлийн домог, тэднээс польш, турк зэрэг харь орны түрэмгий дайсны өөдөөс тэмцэн боссон тухай уянгалуулан дуудахад бяцхан Тарас эх нутгийнхаа зоригт гайдамак нарыг бахдан сэтгэлдээ дүрслэн шагширдаг байжээ. Ер нь ирээдүйн алдарт найраглал «Гайдамакууд» гэдгээ тэр цагаас эхлэн бүтээж эхэлсэн гэж үзэж болох билээ. Тарас тогооч, газрын эзний гэрийн зарц байхдаа угийн авьяасаараа зураг оролдон сэмхэн янз бүрийн зураг ханын зургаас дуурайлган зурдаг байжээ. Гэвч эзэн Энгельгардт үүнийг мэдсэн цагтаа хайр найргүй зоддог байсан юм.
Эзэн Энгельгардтынхан 1831 оны эхээр Петербургт ирэхэд Ширяев гэдэг зураачид зарц Тарас дагалднаар ажиллаж дөрвөн жил өнгөрөхөд их зүйлийг сурч авчээ. Удалгүй нутгийнхаа сайн зураач Сошенко гэдэг хүнтэй танилцаж, улмаар урлагийн академийн профессор Брюллов, алдарт яруу найрагч Жуковский, Украин зохиолч Гребёнка нартай танил болж тэдний хүчээр хамжлагаасаа чөлөөлүүлээд урлагийн академид оюутан болжээ. Тарас энд байхдаа Пушкин, Гоголь, Лермонтов, Жуковский, Гомер, Данте, Шиллер, Вальтер-Скотт нарын зохиолтой танилцжээ.
Ингээд 1837 оны зуны нэг шөнө шүлэг бичиж эхэлжээ. 1840 онд анхны нь бяцхан ном хэвлэгдэн гарчээ.
