Чимидийн ДОГСҮРЭН
(1934 - 2002)
Монгол газар усны нэр судлаач, монгол нэр томьёоны онолч, гарамгай эсперанточ, нэрт дуун хөрвүүлэгч Ч. Догсүрэн Хэнтий аймгийн Батноров суманд 1934 онд төржээ.
1967 онд МУИС-ийн Хэл бичгийн факультетын монгол хэл, уран зохиолын ангид элсэж, 1972 онд төгсөөд ШУА-ийн Хэл зохиолын хүрээлэнгийн Утга зохиолын тасагт эрдэм шинжилгээний туслах ажилтнаар оржээ.
1976 оноос хүрээлэнгийнхээ Нэр томьёоны секторын эрдэм шинжилгээний дэд ажилтан болж, 1979 онд "Монгол газар усны нэр тэмдэглэх болзмол латин цагаан толгой" боловсруулсан байна.
1992 онд "Эсперанто-монгол толь (vortaro)" гаргажээ.
Оюутан ахуй цагаасаа эхлэн орчуулсан Ашот Папаян, Г. Мухтаров, С. Михалков нарын зохиолчдын жүжгүүд Улсын драмын театр, аймгийн соёлын орднуудад амжилттай тавигдаж байв. "Фараон" (гурван дэвтэр), "Ажнай хүлэг минь", "Ах дүү хоёр арслан зүрхэт", "Казань" (чонохойн тууж), "Вүк" (үнэгний тууж), "Эцсийн долоо хоног", "Дорно дахины охин тэнгэрийн алтан мутрын иллэг", "Тамын зовон эдэлсэн минь" зэрэг дэлхийн нэрт зохиолчдын сонгодог бүтээл туурвилыг эх хэлнийхээ үгийн сангийн арвин баялгийг уудлан, яруу найруулгын дээд түвшинд чадамгай монголчилж уншигч олныхоо хүртээл болгосон тэрээр 2000 онд "Фараон" романы орчуулгаар Монголын орчуулагчдын эвлэлийн шагнал хүртжээ.
Эх сурвалж Э. Пүрэвжав "Монгол хэл бичгийн судлал" IX, Улаанбаатар, 2006 цувралаас
