Януш Корчак
(1878 — 1942)
Польшийн сурган хүмүүжүүлэгч, зохиолч, эмч, нийгмийн зүтгэлтэн.
Януш Корчак гэдэг нь энэ хүний зохиолын нууц нэр юм. Жинхэнэ нэр нь Генрик Гольдшмит ажээ. Эцэг нь хэвлүүлсэн ном судартай өмгөөлөгч хүн байжээ. Арваад нас хүртэл эцэг эхийн гар дээр эрх танхи бойжиж, чинээлэг амьдралд өсжээ. Энэ үед зохиолчийн эцэг гэнэтийн өвчнөөр нас барж, гэр орон нь хоосрон Генрик өөрөө ажил хийхээс өөр замгүй болжээ. Ажил хийхийн зэрэгцээгээр дунд сургуулиа төгсөж дараа хүн эмнэлгийн дээд сургуульд оржээ. Энэ үеэс уран зохиолын ажил сонирхож 1898 онд дөрвөн үзэгдэл бүхий драмын жүжиг бичиж «Курьер Варшавский» сониноос зарласан уралдаанд оролцож сайшаагдан улмаар уран зохиол бичих дур хүсэл нь өрнөжээ. Ийнхүү уран зохиол бичих, сургууль соёлдоо суралцах ажлыг зэрэгцүүлэх болсон байна.
1906 онд «Ордны хүүхдүүд» гэдэг номоо хэвлүүлж ихэс дээдэс, баяд ноёдын үр хүүхэд, гэр бүлийг зад шүүмжлэн доромжилжээ.
Ийнхүү залуу Генрик ирээдүйн өсөх үеийг оюун санааны нь хувьд уран бүтээлээр тэтгэн тэжээдэг зохиолч, бие бялдрын нь хувьд туссан өвчнөөс нь авардаг энэрэлт эмч болжээ.
Эмчийн мэргэжлээ дээшлүүлэхийн тул Берлин, Парис, Лондон зэрэг бас бус газраар явжээ. Гэвч Януш Корчак удалгүй эмчийн мэргэжлээ бүрмөсөн орхиж, залуу үеийг хүмүүжүүлэх асуудалд амьдралаа зориулжээ.
Олон талаар хөөцөлдөж, хүч чармайн зүтгэсний үр дүнд 1911 онд Варшав хотноо «Өнчин хүүхдийн асрамжийн газрыг нээн, гучаад жил ажиллуулсан байна. Энэ газрын захирлаар нь «Эмч ах» Корчак ажиллаж байжээ.
Асрамжийн хүүхдүүдтэй баян чинээлэг хүмүүс уулзахаар ирвэл машин тэргийг нь байшингийн нөгөө талд хүүхдүүдэд харагдуулахгүйгээр тавиулдаг байжээ.
Энэ асрамжийн газар 100 гаруй хүүхэдтэй, орон тооны 7 ажилтантай байжээ.
«Хүн өөрийгөө хүмүүжүүлж чадахгүй бол хүнийг хүмүүжүүлж үл чадна» гэж Корчак сургадаг байлаа.
Дэлгэрэнгүйг Wiki-гээс
