Гярхай Буд гэхээр Улзын голынхон анддаггүй юм. Будынх өглөө эртэч, үдэш оройчоороо алдартай. Алдуул малын тухай сураг гаргая гэвэл Будтай л уулзана. Буд хэнийх хэдэн тооны ямар зүсний үхэртэй, хэний адуу хаа яваа, хэний мал өсөж хэд хүрч, хэний малаас хэд үхэж хорж байна гэдгийг бараг тоо толгойгоор нь мэдэж байдаг учраас, нутгийнхан Будыг гярхай, хүнд тусч гэж үнэлдэг тал байвч, зарим нь Буд дэндүү саваагүй, үзсэн харсан бүхнээ тоолж тогтоож явдаг илүү зантай гэж ад үздэг ч тал бий. Будын энэ занд эхнэр Мажид нь бас дургүй. «Хэний хэдэн мал хаа явж байна, чамд ямар хамаатай. Чиний энэ нүдэндээ үзэгдсэн бүхнийг тоолж тогтоож явдаг зан уу, нэг л гай болно шүү» гэж үглэдэг боловч Будын өсөхөөсөө өдий хүрсэн дадал хэвээрээ л байжээ...
