Зохиолч: Т. ХЕЙЕРДАЛ
Орчуулагч: Ш. Доржготов
Ангилал: Намтар, дурсамж Адал явдалт Замын тэмдэглэл газарзүй
Хэвлэлийн газар:
Норвег улсын харьяат бөгөөд үндэстнүүдийн аж байдал, ёс заншил соёл судлагч эрдэмтэн Тор Хейердал таван нөхрийнхөө хамт 1947 онд Перу улсын эргээс Полинезийн арлууд хүртэл Номхон далайг салаар гаталсан билээ.
Халуун оронд ургадаг бальс хэмээх мод огтолж есөн гуалин бэлтгээд тэдгээрээ олс, ургамлын зүйлсээр баглаж холбон гадаад их далайгаар 4300 бээр урт зам туулна гэдэг бол маш их зориг самбаа, тэсвэр хатуужил шаардах зүйл билээ.
Энэхүү гайхамшигт аялал нь Өмнөд Америкт оршин сууж байсан эрт цагийн индиан хүмүүс Номхон далайн Полинезийн арлууд хүртэл салаар аялж байсан гэдгийг батлах зорилготой байлаа. Хейердал бол Полинезийн арлууд дээр оршин суугчид нь Өмнөд Америкийнхаас гаралтай гэж үздэг хүн билээ. Хейердалын зоригт аялал амжилттай болж, энэхүү сонирхолтой номоо бичсэн боловч полинезчууд азийнхнаас гаралтай гэж үзэх үндсэн хэвээр байгаа юм.
Хейердалын энэхүү аялал бол манай өнөө үеийн эрдэм шинжилгээний нэн зориг баатарлаг, гайхамшигт ажил мөн нь яриагүй бөгөөд түүний бичсэн энэ ном бол аяллын талаараа гойд сонирхолтой туужийн нэг билээ. Энэ номыг анх хэвлэгдэн гарснаас нь эхлээд 1948 оноос 1954 он хүртэлх зургаахан жилийн дотор дэлхийн олон улс орон хоёр сая таван зуун мянга гаруй хувиар хэвлэсэн нь санамсаргүй хэрэг биш ээ.
Манай монголын уншигчид уг номыг мөн нэгэн адил сонирхон унших байх гэж итгэн чадлын хэрээр хөрвүүлсэн минь энэ билээ.
Орчуулагч Ш. Доржготов
