Ном бол уншигчийн өмнө шинэ ертөнцийг нээн харуулагч төдийгүй оюуны мэлмийг нээгч шидтэн юм. Та бидний өмнө анхныхаа хуудсыг нээж байгаа энэ ном хэдийгээр мэргэжлийн шинж чанартай боловч ном, номын сан судлалын талаар өгүүлсний дээр эцэг эх, багш, сурган хүмүүжүүлэгч, номын санчид, соёлын ажилтнуудын сонирхон үзэх бүтээл болжээ.
Зохиогч Монгол улсад номын сан, ном зүйн ажил хэрхэн үүсэн хөгжсөн түүхэн төлөвийг энэ талаар урьд өмнө нийтлэгдэж байсан бүтээлүүдийг нэгтгэн дүгнэж, тэдгээрээс уламжлан өөрийнхөө санаагаар баяжуулан энэхүү бүтээлдээ тодорхой өгүүлсэн байна. Түүний энэхүү номын гол санаа нь монголд сургуулийн болон хүүхдийн номын сан бий болж, хүүхэд багачуудын оюун санааны хөгжил, ёс зүй бүрэлдэн төлөвших үйлсэд ном унших, номын сангаас зохиодог олон талт үйл ажиллагаа сургуулиас дутахгүй үүрэгтэй гэдгийг харуулахыг зорьсонд оршино.
Энэхүү номд сургуулийн болон хүүхдийн номын сангийн өнгөрсөн, одоо, ирээдүйг гоёж чимэлгүй, үгүйсгэн хазайлгалгүй, жинхэнэ үнэнээр өгүүлсэн байна гэж санагдаж байна.
Зохиогчийн энэ номд хэд хэдэн шинэ зүйл бий. Сургуулийн болон хүүхдийн номын сангийн талаар урьд өмнө ингэж тусгайд нь онол, түүхийн үүднээс судлан бичиж байсангүй. Зохиогч уншигч монгол хүүхдийн шинж төрхийг ХIII-XX дугаар зуун, 1990 оноос өнөөг хүртэл хоёр хуваан өгүүлсэн нь номын сангийн судлалд төдийгүй, сурган хүмүүжүүлэх, сэтгэл судлал, хүн судлалд шинэлэг зүйл болжээ.
Энэхүү номын өөр нэг шинэ зүйл бол ангийн номын сангийн үйл ажиллагааны үндсийг боловсрол судлалтай холбон авч үзэж, тодорхойлсон явдал юм.
Эцэст энэ номыг зохиогчийн тухай хэдэн үг хэлье. Олхонууд овогтой Дамдинсүрэнгийн Оюунбилэг Ховд аймгийн Дарви сумын уугуул. Ленинградын (одоогийн Санкт-Петербург хотын) Соёлын их сургууль төгсөж, номын сан судлаач-ном зүйч мэргэжлийг эзэмшжээ.
Соёлын дунд сургуульд багш, Улсын төв номын санд ахлах номын санч, хэлтсийн эрхлэгч, дэд захирал зэрэг алба хашиж байсан. Одоо Хүүхдийн номын ордны захирлаар ажиллаж байна. Д. Оюунбилэг нь номын сан судлал, ном зүйн талаар хорь гаруй өгүүлэл нийтлэл хэвлүүлснээс гадна мэргэжлийн хэд хэдэн номд эмхэтгэгч, редактораар ажиллажээ. Тэрээр мэргэжил нэгт нөхдийн хамт улсын хэмжээний номын сангуудын сан хөмрөгийг шинэ ном хэвлэлээр баяжуулах, номын санчдыг сургах, давтан сургахад зориулсан олон улсын төрөл бүрийн төсөл хэрэгжүүлж, дээрх төслүүдийн удирдагчаар ажилласан юм.
Мөн засгийн газрын мөрийн хөтөлбөрийн дагуу хийгдсэн орчин үеийн хүүхэд залуучуудын нас сэтгэл зүйн онцлогт нийцсэн биеэ даасан Хүүхдийн Номын Ордныг үүсгэн байгуулах нөр их ажлыг хамт олноо удирдан амжилттай хийж гүйцэтгэсэн байна.
Доктор (Рh) Профессор Хүүхдийн зохиолч, номын санч-нийтлэлч
