Дамдинсүрэнгийн ОЮУНБИЛЭГ
1962 онд Ховд аймагт төрсөн. 1986 онд ОХУ-ын Санкт-Петербург хотноо Соёлын Дээд сургуулийг номын сан судлаач-ном зүйч мэргэжлээр төгссөн. СУИС-ийн “Хүндэт профессор” цолтой.
Д.Оюунбилэг нь 1986-1989 онд Соёлын Дээд сургуульд багш, 1989 оноос-2002 он хүртэл Улсын Төв Номын Санд (Одоо Монгол Улсын Үндэсний Номын сан) каталогийн ахлах номын санч, хэлтсийн эрхлэгч, дэд захирлаар ажиллаж байсан. 2002 оноос 2020 он хүртэл Хүүхдийн Төв номын сангийн захирлаар ажиллаж байгаад гавьяаныхаа амралтад гарсан.
Тэрээр 2000-2004 оны Монгол Улсын Засгийн газрын мөрийн хөтөлбөрт тусгагдсан “Хүүхдийн номын ордон” байгуулах ажлыг амжилттай хэрэгжүүлж хүүхдийн нас сэтгэхүйн онцлогт тохирсон олон уншлагын танхим бүхий шинэ номын санг байгуулах ажлыг хамт олноо удирдан гүйцэтгэсэн.
Д.Оюунбилэг нь ажиллах хугацаандаа “Номын хандив”, “Пушкины номын сан”, “Монголын номын санчдын сургалтын төв”, “Хүүхдийн номын өргөө”, “Швейцарийн соёл мэдээллийн төв”, “Урлаг –хүүхдийн хөгжилд”, “Эрдэм шинжилгээний байгууллагуудад мэдээллийн автоматжуулсан сүлжээ байгуулах нь”, “Монголын хүүхдийн ном хэвлэлийн ном зүйн нэгдсэн мэдээллийн сан”, “Ховд аймгийн Дарви сумын номын сан”, “Хүүхэд бүр уншигч” зэрэг төсөл хөтөлбөр хэрэгжүүлж номын сангийн салбарт олон сая төгрөгний хөрөнгө оруулалт хийсэн байна.
Д.Оюунбилэг 2015 оноос хэрэгжиж эхэлсэн Монгол Улсын “Номын сангийн тухай хууль”, “Номын сангийн орчны стандарт боловсруулах” болон салбарын 10 гаруй дүрэм, журам боловсруулах ажлын багт орж ажиллажээ. Тэрээр ном судлал-ном зүйн чиглэлээр мэргэжлийн 8 ном, орчуулгын 3 ном, 40 гаруй нийтлэлийг мэргэжлийн болон төвийн хэвлэлүүдэд нийтлүүлсэн. Тэрээр ХТНС-ийн дэргэд номын санчдыг давтан сургах сургалтын төвийг санаачлан байгуулсан бөгөөд тус төвийн сургалтанд давхардсан тоогоор улсын хэмжээний 1000 гаруй номын санч хамрагдаад байна. Түүний номын санчдыг сургах, давтан сургах ажилд оруулсан хувь нэмрийг нь үнэлж 2014 онд Соёл Урлагийн их сургууль “Хүндэт профессор” цол олгосон байна.
Хүүхэд залуучуудад зориулсан цахим номын сан байгуулах ажилд анхаарал тавьж 2007 онд Дэлхийн банкны санхүүжилтээр хүүхдийн уран зохиолын 237 ном, “Дэлхийн хүүхдийн цахим номын сан” –д, “Цогт охин тэнгэр” ХХК-ны цахим хэлбэрт оруулсан 480 номыг өөрийн каталогт холбон бүрэн хэлбэрээр унших боломжыг хангасан.
Мөн гадаадын байгууллагуудтай хамтран ажиллаж номын сангийн хүний нөөцийг чадавхжуулах, техник тоног төхөөрөмжийн шинэчлэл хийх, хөмрөгийн шинэчлэл хийхэд анхааран ажиллаж ирлээ. Тухайлбал, Тогтмол харилцааг бий болгосон Гёте Институт, Азийн сангийн “Ном” хөтөлбөр, Тайваний Үндэсний номын сан зэрэг газраас жил бүр 25 сая төгрөгний шинэ ном хэвлэлээр сан хөмрөгийн баяжилт хийж байна.
Д.Оюунбилэг нь хүүхдийн уран бүтээлчидтэй нягт хамтран ажиллаж МЗЭ-ийн “Хүүхдийн уран зохиолын Үндэсний төв”, “Эвт үзэг” төвтэй хамтран хүүхэд залуучуудыг номтой нөхөрлүүлэх ажлын хүрээнд жилдээ 150 гаруй ажлыг зохион байгуулж байна.
Номын сангийн салбарыг төлөөлсөн Мэргэжлийн Хяналтын Ерөнхий газрын соёлын гэрээт байцаагчаар 2010-2019 оны хооронд ажиллаж номын сангийн салбарын “Шалгалтын хяналтын хуудас” боловсруулах , улсын хэмжээний номын сангуудын үйл ажиллагаанд хяналт шалгалт хийх , Монгол Улсын Үндэсний номын сангийн хөмрөгт хадгалагдаж буй ховор, үнэт ном хэвлэлийг улсын бүртгэл мэдээллийн санд оруулах ажилд хяналт тавих зэрэг ажлыг хийж гүйцэтгэсэн байна.
Д.Оюунбилэгийн номын сангийн салбарт оруулсан хөдөлмөрийг нь үнэлж “Соёлын тэргүүний ажилтан”, Хүүхдийн байгууллагын “Хүүхдийн төлөө” алтан медаль,”Хүүхдийн элч” медаль, МЗЭ-ийн “Утга зохиолын төлөө” шагнал, “ Үндэсний бичиг үсэг дэлгэрүүлэгч” цол тэмдэг , 2001 онд “Хөдөлмөрийн хүндэт медаль”, 2014 онд “Алтан гадас” одон, 2021 онд “Хөдөлмөрийн гавьяаны улаан тугийн одон”-оор тус тус шагнаж урамшуулжээ.
