Бодоод үзээч, би яваар юу ч мэдэхгүй, гэтэл ажилд орж, эрдэмтдийн их хуралд Бразилийг төлөөлөн оролцох ёстой болж байдаг!
Би малай-полинезийн хэл шуурхай үзэж эхэлсэн боловч амжилт олсонгүй. Сайн хооллож, сайхан хувцаслаж, тайван унтаж байгаа үед эсэн бусын ойлгомжгүй зүйлээр толгойгоо ядраах ямар хүсэл байх билээ. Би зөндөө ном худалдан авч хэл шинжлэлийн, хүн судлалын, өөр ямар ч билээ, чөтгөр бүү мэд, олон сэтгүүл захиалсан боловч бүтэл муутай хэвээр. Нэр алдар минь улам өсөж, гудамжинд явахад хүртэл энд тэндгүй л: «Хараач түүнийг, нөгөө ява хэл мэддэг хүн!» гэх дуулдана.
Номын санд очиход минь хэл шинжлэгчид, Зондын олтиргийн арлуудын аль нэг аман аялгуунд төлөөний үгийг хэрхэн хэрэглэдэг талаар надтай зөвлөлдөнө. Эрдэмтэд надад захиа бичиж, сонинууд төгс мэдлэгийг минь хэт магтаж, харин би ява хэл сурахын хүслэн болсон олон шавиас татгалзахаас аргагүй болсон юм. Редакцын хүсэлтээр би «Журнал ду Комерсиу» сэтгүүлд явын эртний болон орчин үеийн уран зохиолын тухай дөрвөн үе өгүүлэл бичлээ.
