ӨГҮҮЛЭХ НЬ:
«Сурагч Ганбат» хэмээх энэхүү өгүүллэгийг зохиолч Дондогийн Цэвэгмид 1940 онд нийслэл Улаанбаатар хотын Чойбалсангийн нэрэмжит нэгдүгээр 10 жилийн дунд сургуульд багшилж байх үедээ туурвин бичжээ.
«Сурагч Ганбат» гэдэг өгүүллэг анх 1940 онд пионерын «Залгамжлагч» сэтгүүлийн 3 дугаарт нийтлэгдсэнээс хойш, хүүхэд багачуудын сонирхон уншдаг зохиол болж улмаар сургуулийн сурах бичгүүдэд эмхэтгэгдэн хэвлэгдэж 1946 онд хуучин бичгээр нийтлэгдсэн зохиолчийн анхны түүвэр, 1956 онд шинэ үсгээр нийтлэгдсэн зохиолчийн хоёр дахь удаагийн түүврүүдэд тус тус хэвлэгдсэнээс гадна, 1948 онд X. Далхажавын нягтлан боловсруулж эмхэтгэсэн дунд сургуулийн VI ангид үзэх утга зохиолын унших бичгийн I ба II хэвлэлүүд болон, ардын хувьсгалын 40 жилийн ойд зориулсан монголын шилдэг өгүүллэгүүдийн түүвэрт 1961 онд нийтлэгджээ.
Манай хүүхдийн утга зохиолын дөчөөд оны уран бүтээлийн голлох зохиолын нэг болох энэхүү «Сурагч Ганбат» гэдэг өгүүллэг нь зохиолч Дондогийн Цэвэгмидийн утга зохиолын ажлыг эхлэх үеийнх нь гол бүтээлийн нэг билээ.
Иймд энэхүү өгүүллэгийг ерөнхий боловсролын дунд сургуулийн утга зохиолын уншлагад зориулан багш, сурагчдын тусламж болгож анх удаа ном болгон оршуулж хэвлэлд бэлтгэн ийнхүү зохиолчийн дахин засамжилсан эхээр нийтлэв.
Өгүүлсэн Ч. Лувсандэндэв
