Зохиолч: ПОЛЬ ДЕ КРАЙФ
Орчуулагч: Д. Дандий
Ангилал: Түүх Эрүүл мэнд, анагаах ухаан Намтар, дурсамж Байгалийн шинжлэл Америк уран зохиол
Хэвлэлийн газар:
Пастер тэр дорхноо олонтоо хийдэг түргэн дүгнэлтийнхээ нэгийг бичсэн нь «Хэрэв үнээ нэгэн удаа боомоор өвчлөөд эдгэрсэн бол үүний дараад боом өвчний нянг цөмийг нэгмөсөн тарилаа ч гэсэн өвчин үүсгэж яавч чадахгүй, яагаад гэвэл үнээ уул өвчинд болсон (дархалсан) аж гэлээ. Ийм нэгэн бодол түүний ухаан санаанд гүнээ шингэж, сэтгэл санаанаас салшгүй болсонд Пастерын хажуугаас гэргий нь юм асууж байхад ч сонсохгүй, харж байгаа юмаа ч үзэхгүй болтлоо бодолд автжээ. Боом өвчний хөнгөн хэлбэрээр малыг яаж өвчлүүлэх вэ? Тэгэхдээ түүнийг үхүүлэхгүй, аюулгүй, хөнгөн тийм хэлбэрээр өвчлүүлээд, тэгэхдээ тэр малыг дахин өвчлөхөөс амь аварч чадах тийм арга юу вэ? Тийм арга ч лав байгаа даа, харин би ямар боловч тийм аргыг сүвэгчлэн олох ёстой» боллоо.
Хэдэн сарын турш ийм бодол өвөрлөсөөр энэ тухайгаа Ру, Шамберлан хоёрт нэг биш удаа сануулж байсан.
— Энэ юун таавар гараад ирэв? Халдварт өвчин дахин давтагдахгүй гэдэг чинь юу гэсэн нууц байдаг билээ? Пастер ч тасалгаандаа цааш нааш холхиж, Дархан болгоно, дархална... бид нянгийн эсрэг дархлах ёстой гэж амандаа үглэнэ...
