Зохиолч: В. М. Шукшин
Орчуулагч: С. Бадраа
Ангилал: Оросын уран зохиол
Хэвлэлийн газар: Улсын хэвлэлийн газар
Алтайд Чуйн дардан зам гэж бий. Энэ бол шилбүүрийн мөр гэмээр гоё зам.
Энэ замын тухай элдвийн олон үлгэр, домог, дуу, зохиол байдаг. Бүхий л сайн эрс, их замын дээрэмчид, хуучин цагийн бүхий л үлгэр домог цөм Чуйн дардан замтай холбогдолтой байдаг болой.
Замын дагуу оршдог гацаа тосгоноос энэ замаар дээхэн үед улаач хийж явсан, сүүлийн үед жолооч хийж яваа хүн олон. Энэ зам бол осол аюул, үлгэр домгоор, үзэмж төгс байдлаараа залуу хүний дур сэтгэлийг ихэд булаадаг болой. Ер нь Бийскээс Инь ордог энэ замаар явахад хэдийгээр (жолооч нарын Чик-атаман гэж нэрлэдэг) Чике-атаманы даваан дээрээс доош харахад айдас хүрч, зүрх алдмаар байдаг боловч тэндхийн өглөөний нүцгэн уулсын үзэсгэлэнтэй сайхныг нэг удаа боловч харж, өндөр уулын цэнгэг хүйтэн тунгалаг агаарыг арьс махаараа мэдрэн үзэх хэрэгтэй юм шүү...
