Зохиолч: Н. С. ЛЕСКОВ
Орчуулагч: Б. Ринчен
Ангилал: Намтар, дурсамж Оросын уран зохиол
Хэвлэлийн газар: Улсын хэвлэлийн газар
Ноднин жилийн тариа ургасангүй, аж ахуй маань өөд муутай байснаас болж маш бэрх байдалд орсноо 1892 оны хавар болоход одоо бэрхийг гайгүй давлаа гэж хэлж болно!.. Айхтар хэцүү юм харин ч ээлтэй өнгөрлөө. Орчин үеийн хэвлэлд сурвалжлагч нарын бичсэн хөдөөгийн хүний эдэлсэн зовлон үнэхээр их, «тэнгэр тулам» байсан ажээ. Түүний өгүүлэн бичсэн байдал, уншин үзэхэд «элэг эмтрэм» боловч, урьд өнгөрсөн цагийн өлсгөлөн тохиолдож байсан үед олон нийтэд түүнийг мэдэгдэн бичдэггүй, мөн нийгэм олны зүгээс «чингэж өлбөрөн хиарч байсан» хүнд туслан тэнхрүүлэх аюултай бэрх юм сэтгэлд ургаж, санаанд ордогтой зэрэгцүүлбэл юу ч биш байна.
Он дараалсан судар хийгээд түүхэнд тэмдэглээстэй түүхтэй бэрх өлсгөлөнгийн тухайд ямаршуу байдалтай байсны тоймыг судар түүхэн зүйлээс мэдэж болох боловч, манайханд түүнээс хожуу бөгөөд бичиг зохиолд «битүүлэг үе» гэцгээдэг цагт тохиолдож байсан өлсгөлөн бас байсан аад тодорхойгүй боловч, дуртгал байх нь бодоход хэрхэвч илүүдэхгүй байх...
